‘तपाईंहरू तोडफोड नगरी, मान्छे नमारी आएको हो, हँ ?’
काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले गत शुक्रबार काठमाडौंको तिनकुनेमा भएको घटनामा राज्य जिम्मेवार रहेको बताएका छन् ।
सोमबारको प्रतिनिधिसभा बैठकमा अध्यक्ष लिङ्देनले घटनाकाबारेमा न्यायिक छानबिनको माग गरेका हुन् ।
उनले चैत १५ गते छतमाथि बसेर गोली र म्याद सकिएको अश्रुग्यास हानिएको बताए। उनले यो घटनामा राज्य जिम्मेवार रहेको भन्दै विश्व समुदाय र मानव अधिकार जमातको ध्यानाकर्षण गराए ।
उनले भने, ‘चैत १५ गते आन्दोलनकारीले मात्र ज्यादती गरेको हो ? त्यो नियन्त्रण गर्ने जिम्मा सरकारको होइन ? तपाईं कांग्रेस–एमाले भन्नेहरू आज भजनकीर्तन गाउँदै सत्तामा मादल बजाउँदै आइपुगेको हो ? तपाईंहरू तोडफोड नगरी आएको हो ? मान्छे नमारी आएको हो, हँ ?’
उनले गणतन्त्रको नाममा लूट मच्चाइएको भन्दै यो अब युवापुस्ताले नमान्ने बताए । अध्यक्ष लिङ्देनले कथा र शब्दजालले अब मानिस नपत्याउने बताए ।
उनले उड्ने प्लेनदेखि बस्ने प्लेन ठाउँसम्म कमिसन खाएको र भ्रष्टाचार गरेको कतै नछिपेको बताए । उनले नेपाली युवालाई नक्कली भुटानी बनाएर बेच्ने पनि यही व्यवस्थाका पक्षपातीहरूबाट भएको बताए ।
