रवि लामिछाने राजतन्त्रको लाइनमा थिए त ?
काठमाडौं । राष्ट्रिय स्वतन्त्र पार्टीले आफूहरुले पूर्ण लोकतान्त्रिक गणतन्त्रात्मक शासन प्रणाली चाहेको बताएको छ ।
पार्टीका पूर्वमहामन्त्री डा. मुकुल ढकालले सभापति रवि लामिछाने राजतन्त्रको पक्षमा रहेको बताएपछि केन्द्रीय सदस्य गणेश कार्कीले गणतन्त्रका विषयमा पार्टीको धारणा चाहनेहरूलाई दस्तावेज पढिदिन आग्रह गरेका हुन् ।
कार्कीले भनेका छन्, ‘प्रस्तावनामा प्रष्ट लेखिएको छ कि रास्वपाले पूर्ण लोकतान्त्रिक गणतन्त्रात्मक शासन प्रणाली चाहन्छ । हजारौं पटक भनेका छौँ कि हामीलाई व्यवस्था हैन, अवस्था फेर्नु छ । गणतन्त्रका विषयमा पार्टीको धारणा चाहनेहरूले दस्तावेज पढिदिनु होला । नेताका भाषण सुनिदिनु होला । दस्तावेज र विचार ऋतु जस्तो फेरिदैन ।’
पूर्वमहामन्त्री ढकालले केहीदिन अघि राजाबाट सकारात्मक कुरा नआएपछि आफूहरु गणतन्त्र कै लाइनमा पार्टी खोल्ने निर्णयमा पुगेको बताएका थिए ।
ढकालले भनेका थिए, ‘राष्ट्रिय स्वतन्त्र पार्टी खोल्नु अघि ‘राजतन्त्र’ को लाइन लिने कि ‘गणतन्त्र’ को भनेर रवि दाइ र मबीच छलफल भयो । त्यतिबेला छलफल गर्नका लागि कोही थिएन, जे जति हुन्थ्यो, हामी दुइबीच नै हुन्थ्यो । राजासँग भेट्न रवि दाइ झापासम्म जानुभयो । राजा र राजाका नजिकका मान्छेसँग उहाँको दुई–चार पटक कुरा पनि भयो । रवि दाइ राजतन्त्रलाई समातेर जाने लाइनमा हुनुहुन्थ्यो । त्यतिबेला मैले रवि दाइलाई भनें, ‘राजा ल्याउने वा आउने कुरा हामीले गरेर हुन्न, राजा आफैंले बोल्नपर्छ । जसलाई ल्याउन खोजेको हो, ऊ आफैँले त ‘म आउने हो’ भन्न पर्यो नि ।’ राजा बोल्न तयार भएनन् , तर त्यसपछि पनि रवि दाइले ‘राजतन्त्र’ लाई कुनै न कुनै ढङ्गले समेटौं भनिराख्नु भयो । मैले प्रस्ताव राखें, रवि दाइले त्यही अनुसार राजासँग पनि कुरा गर्नुभयो । मेरो प्रस्ताव थियो–“राजाको निजी सम्पत्ति नहुने, जनताले राजालाई पाल्ने, राजाको सम्पत्ति ट्रस्टमा लगेर सकेसम्म सबै जिल्ला नत्र कम्तिमा हालका प्रदेश राजधानीमा एक–एक वटा ठूला स्कुल र अस्पताल खोलौँ । यति घोषणा गरि एकैपटक स्कुल र अस्पतालहरूको शिलान्यास गरौँ ।’ राजाबाट सकारात्मक कुरा आएन । राजाबाट सकारात्मक कुरा नआएपछी, गणतन्त्र कै लाइनमा पार्टी खोल्ने निर्णय गर्यौँ ।’
यस्तो छ रास्वपाको प्रस्तावना
