के साँच्चै राजावादी जनमत बढेकै हो ?

-ऋषि कट्टेल ।

अचेल राजावादी भनिनेहरुको चुरिफरी अलि वढेको देखिन्छ । हिजो गणतन्त्रको पक्षमै रहेका सामान्य मानिसहरु अर्थात् एमाले माओवादी कांग्रेसका सामान्य कार्यकर्ताहरु पनि राजाआउँछ भन्न थालेका छन् । सीपी मैनालीहरु जस्ता कम्युनिष्टका खोल ओडेका दरबारका छदम् एजेन्टहरु खुलैमुख खोल्न थालेका छन् । म अस्ति चितवन जन्त गएको थिएँ । त्यहाँपनि मलाई सोधिने प्रश्नहरु मध्ये अधिकांश प्रश्न राजा फर्कन्छ की फर्कदैनन् भन्नेनै थियो । हिजो विवाह भोजमा गएँ । त्यहाँ पनि पचास प्रतिशत कुरा राजाबारेमै गर्नुपर्यो । एकजना पोखराबाट आएका जेष्ठ नागरिकले त भने पोखरामा भएको राजावादीको कार्यक्रममा माओवादीको पुरै संलग्नता थियो । सामाजिक संजालहरुमा पनि अचेल राजावादीहरुकै बढी चर्चा हुन लागेको छ । राजावादीहरु सडकमै निस्कने आँट समेत गरिरहेका छन् । यी सबै तथ्यांकहरुले अचेल अलि बढी नै राजावादीहरुको चुरिफुरी वढेको छ ।
किन यस्तो भइरहेछ ? के साँच्चै राजावादी जनमत बढेकै हो ? यो अवस्था आउनुमा केही कारणहरु देखिन्छन्ः

१) स्वयं सत्तासिनहरुको रणनीतिक योजना । सत्तासिनहरु खासगरी संसदवादीहरु असफल र बदनाम भएका छन् । यिनको विकल्पको खोजी भइरहेको छ । उनीहरु यसलाई टार्न चाहन्छन् । यसको लागि जनमतलाई नयाँ अन्तरविरोधतर्फ धकेल्नु हो । अर्थात् गणतन्त्र र राजतन्त्र बीचको अन्तरविरोध मुख्य बनाएपछि सत्तासिन र जनताको बीच चलिरहेको अन्तरविरोध गौण बन्ने भयो । विषय अर्कोतर्फ मोडियो । त्यसो गरेर गणतन्त्रवादी जनमत आफूतर्फ केन्द्रित गर्न सत्तासिनहरु नै राजावादीलाई उकासिरहेका छन् । स्वयं गृहमन्त्रीनै राजाले पनि बोल्न पाउनुपर्छ भन्दै हिँडेको छ ।

२) यो चुरिफुरीको अर्को कारण मोदी–ओली अन्तरविरोध हो । मोदी राजावादीलाई उकासेर ओली देउवालाई घुँडा टेकाउन चाहन्छ । साधारण दवावले नपुगे हिंसात्मक दवावसम्मको बाटो तय हुन सक्दछ । यो बाटोमा धकेल्न ओलीसमेत उद्दत छन् ।

३) तेस्रो कारण हो माओवादी केन्द्रको सत्ता बहिर्गमन । यही अवस्था कायम रहिरहे दाहालको सत्ता फिर्ति सदाको लागि अन्त्य हुनेछ । यतिमात्र हैन अझै परिस्थिति तलमाथि हुँदै जाँदा युद्ध अपराधीको रुपमा दण्डित हुन सक्ने खतरासमेत विद्यमान छ । यसलाई सामना गर्न ऊ आफैं राजनीतिक मुद्दा लिएर सडकमा जाने नैतिक हैसियत उसमा छैन । यसको निम्ति दाहाल वर्तमान गठबन्धनविरुद्ध सडक तयार गर्न चाहन्छ । यसकोलागि उसले पूर्वतिर कथित पहिचानवादीहरुलाई उचालीरहेछ । रवि लामिछानेलाई काँधमा बोकेको छ । राजावादीहरुलाई बाहिर गाली गरेको जस्तो गर्दै सडकमा आउन प्रेरित गरिरहेछ । ज्ञानेन्द्रसँगको संवादलाई सघन वनाएको छ र मोदीसंग पनि हारगुहार गरिरहेछ । यो चुरिफुरीको एउटा संचालक माओवादी पनि हो । माकुनेहरु जस्ताले पनि आफ्नो राजनीतिक जीवन रक्षाको स्पेश राजावादी अभियानमा देखेका छन् ।

त्यसकारण आमनेपाली जनता जो यस्ता भड्कावमा लागेर वा वर्तमान सत्तासिनहरु संग वाक्क दिक्क भएर विकल्पको भन्नेखोजीमा भौंतारिँदै राजावादीको लहैलहैमा लाग्नु भएको छ तपाईं हामी सबै यो भ्रमबाट मुक्त हुनुपर्दछ । यो सत्ताको विकल्प यो भन्दा समुन्नत जनताको जनगणतन्त्र मात्र हुन सक्दछ । देशमा फेरि राजा फर्कन्छन् भन्नेकुरा केवल भ्रम हो । अहिले ज–जसले राजावादीको वकालत गरेर जनमतलाई द्वन्द्वमा लान चाहेका छन् ति स्वयंनै राजावादी हैनन् । भोटका व्यापारी हुन् ।