जनतालाई डेलिभरी दिने गरी कामको गति बढाउन मन्त्रीहरुलाई कांग्रेसका शीर्ष नेताहरुको निर्देशन
काठमाडौं । नेपाली काङ्ग्रेसका सभापति शेरबहादुर देउवाले पार्टीबाट सरकारमा सहभागी भएका मन्त्रीहरुसँग छलफल कार्यप्रगतिबारे ब्रिफिङ लिएका छन् ।
बिहीबार आफ्नै निवासमा सभापति देउवाले सरकारका कामकारबाहीबारे मन्त्रीहरुसँग जानकारी लिएका हुन् । त्यसक्रममा मन्त्रीहरुले सोचेअनुरूप काम गर्न नसकेको गुनासो गरेका थिए ।
जवाफमा नेताहरुले यसलाई मिलेर समाधान गर्ने आश्वासन दिएको युवा तथा खेलकुदमन्त्री तेजुलाल चौधरीले जानकारी दिए ।
त्यस्तै मन्त्रीहरुसँग अध्यादेशकाबारेमा पनि छलफल भएको थियो । बैठकमा महामन्त्री गगन थापाले अध्यादेश सहमतिमै आएकाले यसबारेमा नकारात्मक धारणा बनाउन आवश्यक नभएको बताएका थिए ।
मन्त्री चौधरीले भने, ‘बैठकमा अध्यादेशको विषयमा पनि छलफल भएको छ, छलफल भएरै ल्याएको भएकाले महामन्त्रीज्यूले पनि पोजेटिभ रूपमा लिनुपर्छ भन्नुभएको छ । हामीसँग छलफल नै गरेर ल्याएकाले यसबारे चर्चा परिचर्चा गर्न आवश्यक छैन।’
छलफलका क्रममा शीर्ष नेताहरुले कांग्रेसले लिएका मन्त्रालयमार्फत जनतालाई डेलिभरी दिने गरी काम गर्न निर्देशन दिएको चौधरीले बताए ।
छलफलमा सभापति देउवाकासाथै महामन्त्रीद्वय गगन थापा र विश्वप्रकाश शर्मा, राष्ट्रियसभा संसदीय दलका नेता कृष्णप्रसाद सिटौला, प्रमुख सचेतक श्यामकुमार घिमिरे, सचेतक सुशीला थिङ सहभागी थिए ।
