एमालेले शान्ति प्रक्रिया टुंगिन लागेका बेला रोक्ने काम गरेको छः अध्यक्ष प्रचण्ड
काठमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्डले शान्ति प्रक्रिया माओवादीलाई सिध्याउने हतियार बनाइएको बताएका छन् ।
बुधबार ‘शान्ति प्रक्रिया र बेपत्ता नागरिक सार्वजनिकीकरणको सवाल’ कार्यक्रममा अध्यक्ष प्रचण्डले राजनीतिक कारणले शान्ति प्रक्रियाका बाँकी काम टुंग्याउन कठिन भएको बताए । उनले नेकपा एमालेले शान्ति प्रक्रिया टुंगिन लागेका बेला रोक्ने गरेको आरोप लगाए ।
उनले माओवादीलाई तह लगाउने सिध्याउने अन्तिम हतियार यही नै हो टुङ्ग्याउन हुन्न भन्ने सोच भएको प्रवृत्तिले समस्या भएको बताए ।
उनले भने, ‘यो कुरा आवेग पनि होइन, सेन्टिमेन्ट पनि होइन एउटा राजनीतिक नेतृत्व र प्रवृत्ति त्यस्तो छ जुन टुंगिन लागेका बेला गएर रोक्छ । माओवादीलाई तह लगाउने सिध्याउने अन्तिम हतियार यही नै हो टुङ्ग्याउन हुन्न भन्ने सोच भएको प्रवृत्ति छ ।’
उनले अब पनि शान्ति प्रक्रिया टुंगो नलागे अर्को १८ वर्षसम्म पनि टुङ्गो नलाग्ने बताए । उनले भने, ‘यसको समाधान पीडितहरूले बेलाबेलामा यो कुरा उठाइराख्नु, जरुरी पर्दा सडकमा पनि जाने तयारी गर्नु । किनभने अन्तिममा सडक नै हुने हो कि जस्तो मलाई लागेको छ । पीडितहरू एकताबद्ध भएर राज्यलाई र राजनीतिक नेतृत्वलाई अब त नसोचे बर्बाद हुने भयो भन्ने ठाउँमा नपुर्याएसम्म यो अर्को १८ वर्ष जान नि बेर छैन ।’
अहिले पनि संक्रमणकालीन न्यायको बिषय टुंग्याउन कठिन हुनुमा राजनीति नै कारक रहेको उनले बताए ।
