ओलीलाई सुमनाको प्रश्नः नेपाल फर्किएर आएका महिलाको त माइत हो भन्ने व्यक्तिले कुन नैतिक धरातलदेखि नेपाल फर्क भन्ने हो ?
काठमाडौं । राष्ट्रिय स्वतन्त्र पार्टी (रास्वपा)की सांसद एवं पूर्वशिक्षामन्त्री सुमना श्रेष्ठले अमेरिका भ्रमणमा रहेका प्रधानमन्त्री केपी शर्मा ओलीलाई विदेशमा रहेका नेपाली युवालाई ‘कुन नैतिक धरातलदेखि नेपाल फर्क भन्ने हो’ भन्दै प्रश्न गरेकी छन् । सोमबार सामाजिक संजालमार्फत श्रेष्ठले हार्वर्ड र कोलम्बिया विश्वविद्यालयमा प्रधानमन्त्री ओलीले सम्बोधन लागेको भन्दै यस्तो प्रश्न गरेकी हुन् ।
उनले भनेकी छन्, ‘नेपालको विश्वविद्यालयमा विद्यार्थीलाई दलगत राजनीतिमा आबद्ध गराउन शपथ खाएर उता हार्वर्ड र कोलम्बिया विश्वविद्यालयमा हाम्रा प्रधानमन्त्री ओलीज्यू सम्बोधन दिन लाग्नु भएको छ। न्युयोर्क र बस्टनमा हुनुहुने सबैले गएर सुन्नुहोला है । अनि मेरोतर्फबाट एउटा प्रश्न पनि सोधिदिनु होला–नेपाल फर्किएर आएका युवालाई तुच्छ व्यवहार गर्ने, देशलाई पुरुषको मात्र हो, महिलाको त माइत हो भन्ने व्यक्तिले कुन नैतिक धरातलदेखि फर्क भन्ने हो ?’
