एकीकृत समाजवादीको केन्द्रीय कमिटी २९९ सदस्यीय हुने, वरिष्ठ उपाध्यक्ष पद थप्ने
काठमाडौं । नेकपा (एकीकृत समाजवादी)ले वरिष्ठ उपाध्यक्ष पद थप्ने निर्णय गरेको छ । बिहीबार बसेको सचिवालय बैठकले वरिष्ठ उपाध्यक्ष पद थप गर्ने निर्णय गरेको हो । अब वरिष्ठसहित सात उपाध्यक्ष हुनेछन् ।
सचिव सातदेखि ९ जनासम्म हुने जनाइएको छ । त्यस्तै, बैठकले आगामी महाधिवेशनबाट केन्द्रीय कमिटी २९९ सदस्यीय बनाइने निर्णय गरेको प्रवक्ता जगन्नाथ खतिवडाले जानकारी दिए । त्यस्तै, पार्टीमा अहिले रहेको सम्मानित नेताको पद पनि कायमै राख्ने सहमति भएको उनले बताए ।
त्यसैगरी केन्द्रीय उपाध्यक्षमा महिला सिट सुरक्षित रहने व्यवस्था गरिएको छ । प्रवक्ता खतिवडाले सर्वसम्मत रूपमा नेतृत्व चयन गर्ने तयारी रहेको पनि बताए ।
पार्टी अध्यक्षमा माधवकुमार नेपाल, झलनाथ खनाल र घनश्याम भूसालले दाबी गर्दै आएका छन् । एकीकृत समाजवादीको महाधिवेशन असार १६ देखि २० गतेसम्म काठमाडौंमा हुँदैछ ।
