महामारीको कहालिलाग्दो समयमा जनतामाथि यति ठूलो धोका ?
काठमाडौं । नेपाली कांग्रेसका नेता डा. शेखर कोइरालाले कमिसन नमिलेकै कारण प्रधानमन्त्री केपी ओली निकट व्यावसायीहरु विजय दुगड र ऋतु वैद्यले कोरोना भ्याक्सिन रोकेको भन्ने खबरले लज्जित बनाएको बताएका छन् ।
बिहीबार सामाजिक संजालमार्फत कोइरालाले महामारीको कहालिलाग्दो समयमा जनतामाथि यति ठूलो धोका हुनु दुर्भाग्यपूर्ण भएको बताएका हुन् । उनले देश र जनता कोरोना संक्रमणको महामारीमा रहेको समयमा स्वयं प्रधानमन्त्रीकै छत्रछायाँमा रहेका व्यावसायीहरुले जनस्वास्थ्य माथि गरेको यति ठूलो अपराध र बेइमानी कदापि क्षम्य हुन नसक्ने बताएका छन् ।
कोइरालाले यसको सबै जिम्मेवारी प्रधानमन्त्रीले लिनुपर्ने र समय आएपछि जनताले यसको हिसाब गर्ने बताएका छन् । कोभिडविरुद्धको खोप खरिदमा प्रधानमन्त्री निकटका व्यवसायीको कमिसनको चक्करमा रोकिएको खबर सार्वजनिक भएको छ । तर यसबारेमा प्रधानमन्त्री ओलीले केही बताएका छैनन् । यसबारेमा बुधबार नेपाली कांग्रेसले प्रधानमन्त्री ओलीको ध्यानाकर्षण गराइसकेको छ ।