सबै मिलेर सरकारलाई सघाउनु अहिलेको राष्ट्रिय आवश्यकता होः प्रचण्ड
काठमाडौं । सत्तारुढ नेपाल कम्युनिष्ट पार्टीक अध्यक्ष पुष्पकमल दाहाल प्रचण्डले कोरोनाको महामारी रोकथामका लागि सबै मिलेर अघि बढ्नुको बिकल्प नभएको बताएका छन् ।
साझा पार्टीका संयोजक रवीन्द्र मिश्रसँगको टेलिफोन कुराकानीमा अध्यक्ष प्रचण्डले यस्तो बताएका हुन् । प्रचण्डले भनेका छन्, “अहिले पशुपतिनाथले रक्षा गर्छन् भनेर बस्ने स्थिति छैन। उच्चस्तरीय राजनीतिक संयन्त्रको विचार मलाई राम्रो लाग्यो। वास्तवमा त्यो आवश्यक छ। म यो सुझावलाई निश्कर्षमा पुर्याउन प्रयास गर्छु।“
कुराकानीका क्रममा संयोजक मिश्रले प्रचण्डलाई उच्चस्तरीय राजनीतिक संयन्त्र लगायत सबै मिलेर सरकारलाई सघाउनु अहिलेको राष्ट्रिय आवश्यकता भएको भन्दै त्यसका लागि पहल गर्न आग्रह गरेका थिए । बुधबार मिश्रले कांग्रेस सभापति शेरबहादुर देउवासँग टेलिफोनमा कुरा गरी उच्चस्तरीय राजनीतिक संयन्त्र बनाउन पहल गर्न आग्रह गरेका थिए । त्यसका लागि आफूले पहल गर्ने तर प्रधानमन्त्रीको काम गराईले आफू चिन्तित रहेको देउवाले बताएका थिए ।
साझा पार्टीले करिव दुई हप्ताअघि नै प्रधानमन्त्रीको नाममा सुझावपत्र लेख्दै यो संकटसँग जुध्न राष्ट्रिय एकता आवश्यक भएकोले ‘उच्चस्तरीय सर्वदलीय राजनीतिक संयन्त्र’को प्रस्ताव गरेको थियो ।
