एमसीसीको बहस एउटा निचोडमा पुगेपछि संसदमा पेश हुन्छः सभामुख
काठमाडौं । सभामुख अग्निप्रसाद सापकोटाले, अमेरिकासँगको सहयोग कार्यक्रम मिलेनियम च्यालेन्ज कर्पोरेसन (एमसीसी) सम्झौता संसदबाट अनुमोदनका लागि दलको निर्णयको पर्खाइमा रहेको बताएका छन् ।
सिंहदरबारमा सोमबार पत्रकारसंग कुरा गर्दै सभामुख सापकोटाले दलको निर्णय प्राप्त हुनासाथ सो सम्झौतालाई अनुमोदनका लागि पेश गर्ने बताए । उनले सत्तारूढ पार्टी तथा सबै पक्षसँगको सहमतिबमोजिम संसदमा एजेन्डामा समावेश गर्ने बताए ।
सभामुख सापकोटाले सत्तारुढ पार्टी, विभिन्न पार्टीका मुख्य सचेतक, सचेतक र राष्ट्रिय रुपमा समेत त्यस विषयमा छलफल चलिरहेको भन्दै बहस एउटा निचोडमा पुगेपछि आफूले प्रक्रिया अघि बढाउने बताए ।
त्यस्तै उनले सांसदहरुले सीमासम्बन्धी तयार पारेको संकल्प प्रस्ताव आगामी बैठकमा पेस हुने जानकारी दिए । रिक्त उपसभामुख पदमा चयन गर्नेबारे दलहरुबीच छलफल जारी रहेको र त्यसमा पनि दलीय सहमति भएपछि उपसभामुख चयन प्रक्रिया सुरु हुने सभामुख सापकोटाको भनाई थियो । उनले आफूले प्राथमिकताका आधारमा बिधेयकहरुलाई संसदबाट अघि बढाएको बताए ।
