दशैँ मनाउन सर्वसाधारणहरु घर फर्किएसँगै उपत्यका सुनसान, करिब २७ लाख सर्वसाधारण बाहिरिए
सर्वसाधारणहरु दशैँ मनाउन घर गएसँगै काठमाडौँ उपत्यका सुनसान बनेको छ ।
उपत्यकामा गुड्ने सवारीसाधन निकै कम देखिएका छन् । सीमित भाडाका र निजी गाडी तथा मोटरसाइकल मात्रै सडकमा गुडेको महानगरीय ट्राफिक प्रहरी महाशाखाले जनाएको छ ।
पछिल्लो २४ घण्टामा काठमाडौंबाट १७ हजार ३ सय ४५ गाडीमा १ लाख ५७ हजार ३ सय ८८ जना बाहिरिएका छन् । यस्तै १२ हजार २ सय ९५ गाडीबाट ३६ हजार ७ सय ६० जना काठमाडौं भित्रिएका छन् ।
दशैं मनाउन उपत्यकाबाट अहिलेसम्म करिब २७ लाख मानिस बाहिरिएको महाशाखाले जनाएको छ । पछिल्लो २४ घण्टामा ६ सय १० सवारी साधनलाई कारबाही गरिएको नेपाल प्रहरीका प्रवक्ता एवं प्रहरी नायब महानिरीक्षक (डीआईजी) विश्वराज पोखरेलले बताए ।
उपत्यकाबाहिर मानिसको जाने क्रम बढे पनि पछिल्लो केही वर्षदेखि उपत्यकाबाहिरबाट काठमाडौंमा आएर दशै मनाउने क्रम समेत बढेको छ ।
