औषधि व्यवसायीका समस्या समाधानका लागि व्यवसायीको माग
काठमाडौं । औषधि व्यवसायीहरुको व्यवसायिक प्रमाणपत्र (लाइसेन्स) नविकरणमा औषधि व्यवस्था विभाग लचक देखिएको छ । औषधि व्यवसायका लागि विभागबाट जारी हुने व्यवसायिक प्रमाणपत्रको नविकरण पाँच वर्षमा गर्ने व्यवस्था गर्न औषधि व्यवसायीहरुले माग गरेपछि विभागले लाइसेन्सको अवधि बढाउन सक्ने संकेत गरेको हो ।
शनिबार आयोजित नेपाल औषधि व्यवसायी संघ, बागमती प्रदेशको प्रथम अधिवेशनलाई सम्बोधन गर्दै विभागका महानिर्देशक भरत भट्टराईले व्यवसायीलाई दिइने व्यवसायिक प्रमाणपत्रको अवधि बढाउन सकिने बताए । महानिर्देशक भट्टराईले भने तीन वर्षदेखि पाँच वर्ष भित्र कहिले नविकरण गर्ने भन्ने सम्बन्धमा छलफल गरेर टुंगोमा पुग्न सकिने बताए ।
अहिले औषधि व्यवसायका लागि दिने व्यवसायिक प्रमाणपत्रको हरेक वर्ष नविकरण गर्नुपर्ने व्यवस्था छ । कार्यक्रममा नेपाल औषधि व्यवसायी संघ, बागमती प्रदेशका कार्यवाहक अध्यक्ष ध्रुव नारायण श्रेष्ठले खुद्रा व्यवसायी, थोक व्यवसायी र आयात व्यवसायीहरुका आ–आफ्नै समस्या रहेकोले सबैलाई एकैठाउँमा भेला गरी एकमुष्ट रुपमा समस्याको समाधान खोज्नुपर्ने बताए ।
