थप ४७३ जनामा कोरोना संक्रमण, संक्रमितको संख्या १४,५१९ पुग्यो
काठमाडौं । नेपालमा पछिल्लो २४ घण्टामा थप ४७३ जनामा कोरोना संक्रमण पुष्टि भएको छ । स्वास्थ्य मन्त्रालयका अनुसार देशका विभिन्न प्रयोगशालामा गरिएको परीक्षणमा थप ४७३ जनामा कोरोना संक्रमण पुष्टि भएको हो । योसँगै कोरोना संक्रमितको संख्या १४,५१९ पुगेको छ । त्यसैगरी बिहीबार ६६४ जना डिस्चार्ज भएका छन् ।
योसँगै अहिलेसम्म डिस्चार्ज हुनेको संख्या ५,३२० पुगेको मन्त्रालयले जनाएको छ । त्यस्तै पछिल्लो २४ घण्टामा पीसीआर विधिबाट ४,५३७ जनाको नमुना परीक्षण गरिएको छ ।यसैबीच नेपालमा कोरोना संक्रमणबाट थप एक जनाको मृत्यु भएको छ । ४९ दिनका एक शिशुको मृत्यु भएको हो । त्रिवि शिक्षण अस्पतालमा उपचाररत एक शिशुको असार १७ गते अपरान्ह ४ बजे मृत्यु भएको स्वास्थ्य तथा जनसंख्या मन्त्रालयले जनाएको छ ।
मन्त्रालयले आयोजना गरेको नियमित प्रेस ब्रिफिङमा मन्त्रालयका प्रवक्ता डा. जागेश्वर गौतमले म्याग्दी जिल्ला धौलागिरी नगरपालिका वडा नम्बर चारका ४९ दिनका शिशुको उपचारको क्रममा मृत्यु भएको जानकारी दिए । उनको असार ९ गतेदेखि त्रिवि शिक्षण अस्पतालमा भेन्टिलेटरमा उपचार भइरहेको र पहिलो चरणको डायलासिस समेत भएको प्रवक्ता गौतमले बताए । यससँगै नेपालमा कोरोना संक्रमणबाट मृत्यु हुनेको संख्या ३१ पुगेको छ ।
