क्लिनफिड सम्बन्धी समाचार तथा टिप्पणीप्रति विज्ञापन संघको ध्यानाकर्षण
काठमाडौं । नेपाल विज्ञापन संघ (आन) ले क्लिनफिड सम्बन्धी समाचार तथा टिप्पणी बदनियतपूर्ण रहेको जनाएको छ । विज्ञप्ति जारी गरी संघले केही समयदेखि विभिन्न सञ्चारमाध्यमहरुमा क्लिन फिडका विषयमा सार्वजनिक भएका समाचारहरुप्रति गम्भीर ध्यानाकर्षण भएको जनाएको हो ।
“नेपाल सरकारको निर्णय सहित र संसदबाट पारित भइ राष्ट्रपतिबाट प्रमाणीकरण भएर नेपाल राजपत्र खण्ड ६९ अतिरिक्ताङक १५ मिति २०७६ कार्तिक ८ गते प्रकाशित भइ कानुनी रुपमा अगाडि बढीसकेको विज्ञापन विधेयकको परिच्छेद २ को दफा ६ उपदफा २ मा स्पष्टरुपमा क्लिन फिडका विषयमा उल्लेख भएका विषयभन्दा फरक खालका धारणाहरु सार्वजनिक हुनु आफैंमा विरोधाभाष छ,“ जारी विज्ञप्तीमा भनिएको छ ।
यस्ता विषयमा आमसञ्चार माध्यममा आएका समाचार तथा टिप्पणिहरु बदनियतपूर्ण छन् भन्ने नेपाल विज्ञापन संघको ठहर छ । विज्ञापन बोर्ड गठन तथा विज्ञापन नियमन गर्न बनेको विधेयकको कार्यविधि बनाएर सम्बन्धित मन्त्रालयले अगाडि बढाउने कुरामा संघ विश्वस्त रहेको जनाइएको छ ।
साथै क्लिन फिडको समयाबधि २०७७ कात्तिक ७ गते समाप्त हुने भएकोले समयमै लागु हुने विषयमा पनि संघलाई कुनै दुविधा नरहेको जनाएको छ । विधेयकमार्फत कानुनी रुपमा अगाडि बढिसकेको क्लिनफिड तोकिएकै मिति २०७७ कात्तिक ८ गतेदेखि लागू गर्न सम्बन्धित मन्त्रालय एवं नेपाल सरकारसँग संघले माग गरेको छ ।
