बिहीबारदेखि काठमाडौंमा ‘दुई व्यक्ति मैत्रिकला प्रदर्शनी’ हुने
काठमाडौं । नेपाल अन्तर्राष्ट्रिय प्रदर्शनी सङ्घले आगामी बिहीबार काठमाडौमा कलाकारद्वय धर्मराज शाक्य (नेपाली) र झेन झोन्गी(चीन) को ‘दुई व्यक्ति मैत्रिकला प्रदर्शनी’ गर्ने भएको छ ।
संघले मंगलबार काठमाडौमा पत्रकार सम्मेलन गरी प्रदर्शनीबारे जानकारी गराएको हो । नेपाली कला, संस्कृति तथा नेपाली उत्पादनको विकास, निर्यात प्रवद्र्धन र बजारीकरणका लागि विभिन्न अन्तर्राष्ट्रिय स्तरका मेलाहरु आयोजना गर्दै आएको संघले विहीबारदेखि काठमाडौको बबरमहलस्थित नेपाल कला परिषद्मा कला प्रदर्शनी आयोजना गर्न लागेको हो ।
पत्रकार सम्मेलनमा प्रदर्शनीका संयोजक तथा संघका महासचिव शान्तकुमार श्रेष्ठले नेपाल–चीन दौत्य सम्बन्धको ६५ वर्ष पुगेको सन्दर्भमा नेपाल कला परिषद्मा दुई देशका कलाकारहरुको मैत्रीकला प्रदर्शनी गर्न लागेको जानकारी दिए ।
प्रदर्शनी पाँच दिनसम्म चल्नेछ । प्रर्दशनीमा २२ वटा गणेशका चित्रका साथै १० वटा नेपाली मुर्ति र कलाकार झेन झोन्गी(चीन)का ३० वटा चित्र प्रदर्शनी राखिने बताइएको छ ।
