चिनियाँ राष्ट्रपति सीद्वारा ‘ भ्रष्टाचारविरुद्ध पूर्ण युद्ध’ को प्रतिज्ञा
बेइजिङ । चिनियाँ राष्ट्रपति सी जिनपिङले सोमबार देशको शीर्ष अनुशासनात्मक निकायको वार्षिक योजना बैठकका लागि बेइजिङमा शीर्ष नेताहरूको बैठकमा ‘भ्रष्टाचार विरुद्धको पूर्ण युद्ध’ को प्रतिज्ञा गरेका छन् ।
“हामीले सधैँ आफ्नो दृढता र लगनशीलता कायम राख्नुपर्छ… र भ्रष्टाचार विरुद्धको कठिन, दीर्घकालीन र पूर्ण युद्धमा दृढतापूर्वक लड्नुपर्छ”,सीले भने ।
उनले एक दशकअघि मात्रै सत्तामा आएपछि आधिकारिक भ्रष्टाचारविरुद्ध व्यापक अभियान सञ्चालन गरेका छन् ।
समर्थकहरूका अनुसार यो नीतिले स्वच्छ शासनलाई बढावा दिन्छ । यद्यपि अरूले यसलाई सीले राजनीतिक प्रतिद्वन्द्वीहरूलाई सफाया गर्ने माध्यमका रूपमा पनि प्रयोग गरेको बताएका छन् ।
नोभेम्बरमा सत्तारूढ कम्युनिस्ट पार्टीले एक शीर्ष सैन्य अधिकारीलाई निलम्बन गरी ‘अनुशासनको गम्भीर उल्लङ्घन’ को अनुसन्धानको दायरामा ल्याएको थियो । यो भ्रष्टाचारका लागि प्रयोग गरिने सामान्य शब्द हो ।
एडमिरल मियाओ हुआ बेइजिङको शक्तिशाली केन्द्रीय सैन्य आयोगका सदस्य थिए । शीर्षमा सीसहित अन्य पाँचजना पुरुषहरूसँगै बसेका थिए ।
एक वर्षभन्दा केही बढी समयमा देशको सशस्त्र बलमा भ्रष्टाचार विरुद्धको व्यापक कारबाहीमा दुई पूर्व रक्षामन्त्री सहित उच्च पदस्थ व्यक्तिहरूको लामो सूचीमा उनी पनि समावेश थिए ।
सीले सोमबार भ्रष्टाचारलाई कम्युनिस्ट पार्टीका लागि ‘सबैभन्दा ठूलो खतरा’ भन्दै ‘भ्रष्टाचार विरुद्धको लडाइँ अझै गम्भीर र जटिल रहेको’ बताए ।
पार्टीो केन्द्रीय अनुशासन निरीक्षण आयोगको बैठकमा उनले भ्रष्टाचारका घटनाहरू निरन्तर भइरहेका छन् भन्दै भ्रष्टाचारलाई बढावा दिने अवस्थाहरू हटाउने काम अझै कठिन रहेको बताए ।
चीनले डिसेम्बरमा घुस र सार्वजनिक कोषको दुरुपयोग लगायतका अपराधहरूमा इनर मङ्गोलियामा कार्यरत एक पूर्व अधिकारीलाई मृत्युदण्ड दिएको थियो ।
व्यापक भ्रष्टाचार विरोधी अभियानले चिनियाँ पुरुष राष्ट्रिय फुटबलका पूर्व प्रशिक्षक ली टाइसहित वित्त र खेलकुदका शीर्ष नामहरूलाई पनि समातेको छ ।
