युक्रेनलाई अस्त्र दिने देशका सैन्य संरचनामा पनि आक्रमण गर्ने पुटिनको चेतावनी
बीबीसी । रुसी राष्ट्रपति भ्लादिमिर पुटिनले आफ्नो सेनाले युक्रेनमा प्रहार गरेको अस्त्र अन्तरमहादेशीय बलिस्टिक मिसाइल (आईसीबीएम) नभएको दाबी गरेका छन् । उनका अनुसार रुसले युक्रेनको डिनिप्रो क्षेत्रमा बिहीबार बिहान ‘नयाँ परम्परागत मध्यमदूरीको क्षेप्यास्त्र’ प्रहार गरेको हो ।
पुटिनका अनुसार युक्रेनले अमेरिका र बेलायतले उपलब्ध गराएका हतियार प्रयोग गरेर आफ्नो भूमिमा आक्रमण गरेको जवाफ दिन रुसले ‘ओरेश्निक’ नामक क्षेप्यास्त्र प्रहार गरेको हो । उनले युक्रेनलाई रुसी भूभागमा आक्रमण गर्न हतियार उपलब्ध गराउने देशहरूका सैन्य संरचनामा पनि रुसले आक्रमण गर्न सक्ने चेतावनी दिएका छन् ।
अमेरिका र बेलायतले आफ्नो पुरानो नीतिमा परिवर्तन गर्दै यसै साता युक्रेनलाई अमेरिकी ‘आर्मी ट्याक्टिकल मिसाइल सिस्टम’ (एटीएसीएमएस) र बेलायतको ‘स्टोर्म श्याडो’ क्षेप्यास्त्र प्रयोग गर्ने अनुमति दिएका थिए ।
युक्रेनका राष्ट्रपति भोलोदिमिर जेलेन्स्कीले रुसले नयाँ क्षेस्यास्त्र प्रहार गर्नु ‘अझ युद्ध चर्काउने’ कदम भएको बताएका छन् । उनले भने, ‘पुटिनले युद्ध लम्ब्याइरहेको मात्रै हैनन्, उनले वास्तवमै शान्ति चाहने विश्वका मानिसहरूका मुखमा थुकिरहेका पनि छन्।’
यसअघि जेलेन्स्कीले रुसी क्षेप्यास्त्रमा आईसीबीएमको विशेषता रहेको बताएका थिए। तर यसमा पश्चिमा अधिकारीहरूले संशय व्यक्त गरेका थिए ।
अमेरिकी नेशनल सेक्युरिटी काउन्सिलले पनि ‘युक्रेनविरुद्ध परीक्षणकालीन मध्यम दूरीको क्षेप्यास्त्र’ प्रहार भएको जनाएको छ । अमेरिकी निकायले रुससँग यस्ता हतियार ‘औँलामा गन्न सकिने सङ्ख्यामा मात्रै’ रहेको र यसले युद्धमा ठूलो भिन्नता नल्याउने बताएको छ ।
