दुई महिनापछि फेरि खुले इङ्ग्ल्यान्डमा विद्यालय

इङ्ग्ल्यान्डका लाखौँ विद्यार्थी दुई महिनाभन्दा लामो लकडाउनपछि सोमबारदेखि विद्यालय जान थालेका छन् । यो साता त्यहाँका धेरै माध्यमिक विद्यालयहरू बिस्तारै खुल्दै जाने बताइएको छ। विद्यार्थीहरूले कोभिड परीक्षण गर्नुपर्ने र कक्षामा मास्क लगाउनुपर्ने नियम बनाइएको छ । अधिकांश प्राथमिक विद्यालयहरू पनि खुलेका छन् ।

प्रधानमन्त्री बोरिस जोनसनले यसलाई ‘सामान्य भएको सोच’तर्फ जान महत्वपूर्ण कदम भएको बताएका छन् । कोरोनाभाइरसको महामारी सुरु भएयता इङ्ग्ल्यान्डमा यसरी विद्यालय खोलिएको यो चौथो पटक हो ।

शिक्षामन्त्री गेभिन विलियम्सनका अनुसार छुटेका पाठ पूरा गर्न सरकारले विद्यालय समय लम्ब्याउने र बिदा कम गर्ने जस्ता अन्य उपायबारे विचार गरिरहेको बताएका छन् । माध्यमिक विद्यालयहरूमा नियमित कोभिड परीक्षण गरिने र विद्यार्थीहरूले तीन पटक परीक्षण गरेपछि घरमै परीक्षण गर्ने व्यवस्था गरिने बताइएको छ।