इंग्लिस प्रमियर लिगमा वोल्भ्सको क्रिष्टल प्यालेसमाथि २-० गोलअन्तरको जित
रायन एइट नोउरीले डेब्यू खेलमा गोल गरेपछि इंग्लिस प्रमियर लिगमा वोल्भ्सले क्रिष्टल प्यालेसमाथि २-० गोलअन्तरको जित हासिल गरेको छ । यो घरेलु जितले उसलाई लिग तालिकाको संयुक्त शीर्ष स्थानमा पुर्याएको छ ।
फ्रान्सको यू-२१ टिमका सदस्य १९ वर्षीय लेफ्ट ब्याक नोउरी खरिद गर्ने बिकल्पसहित सिजन लामो लोनमा यसै महिना फ्रान्सेली लिग वान क्लब एन्जर्सबाट अनुबन्ध भएका थिए ।
डेब्यू खेलको एउटा गोलको खतरा टारेका उनले १८ औं मिनेटमा आफैंले गोल गर्न सके । त्यसको ९ मिनेटपछि नै पोर्चुगलका विंगर ड्यानियल पोडेन्सले अग्रता दोब्बर पारे र घरेलु टोलीलाई सहज अवस्थामा पुर्याए ।
उनले पेड्रो नेटोको क्रसलाई सदुपयोग गरेका हुन् । सातौं खेलमा चौथो जित हासिल गरेको वोल्भ्सले तालिकाको तेस्रो स्थानमा छ । एभर्टन र लिभरपुलको पनि समान १३ अंक छ तर गोलअन्तरमा वोल्भ्स तेस्रोमा पुगेको हो । उपल्ला २ टिमले एक खेल कम खेलेका छन् ।
