भीम रावलभित्र कति नकारात्मक कुराले भरिएको प्रष्ट भएको छ, गालीगलौजले देश बन्दैनः उपमहासचिव ज्ञवाली
काठमाडौं । नेकपा एमालेले अध्यक्ष केपी शर्मा ओलीमाथि भीम रावलले लगाएको आरोप माओवादी केन्द्रका अध्यक्ष पुष्पकमल दाहाल प्रचण्डले लगाएको १९ बुँदे आरोपको ‘कपी पेस्ट’मात्र भएको निष्कर्ष निकालेको छ ।
बिहीबार बसेको पार्टी सचिवालय बैठकले रावलको आरोप २०७७ साल कात्तिकमा प्रचण्डले १९ पेजको आरोपको कपी पेस्ट भएको निष्कर्ष निकालेको उपमहासचिव प्रदीप ज्ञवालीले जानकारी दिए ।
उपमहासचिव ज्ञवालीले रावलले ३१ पृष्ठको दस्तावेजमा ३० पृष्ठ गालीगलौज अनि पौने प्यारामा अभियान चलाउँछु भनिसकेपछि पार्टीमा कुनै छलफल गरिरहनुपर्ने गम्भीर विषय नरहेको पनि बताए ।
उनले भने, ‘२०७७ साल कात्तिकमा लगभग यी नै भाषामा प्रचण्डले १९ पेजको आरोप लगाउनु भएको थियो । एक किसिमले कपी पेष्ट हो । त्यसले उहाँभित्र कति नकारात्मक कुराले भरिएको प्रष्ट भएको छ । गालीगलौजले देश बन्दैन ।’
