सत्तारुढ नेकपाको सचिवालय बैठक बस्दै
काठमाडौं । सत्तारुढ नेकपाको जारी विवाद स्थायी कमिटीबाट समाधान नभएपछि आज स्थायी कमिटी बैठक रोकेर सचिवालय बैठक बोलाइएको छ । दिउँसो तीन बजेका लागि बैठक बोलाइएको हो । स्थायी कमिटी बैठकमा प्रधानमन्त्री केपी शर्मा ओलीको अध्यक्ष र प्रधानमन्त्री दुबै पदबाट राजीनामा माग गरिएपछि बैठक पटक पटक स्थगित हुँदै आएको छ । यसबीचमा दुई अध्यक्ष ओली र प्रचण्डबीच दर्जनौं पटक छलफल भएपनि विवाद समाधान हुन सकेको छैन ।
सचिवालय बैठकमा जारी विवाद समाधानका लागि केन्द्रीय कमिटी बैठक बोलाउनेबारे पनि छलफल हुने बताइएको छ । समसामयिक विषयमा छलफल, सरकारका कामको समीक्षा तथा पार्टी एकताका बाँकी कामहरु टुंगो लगाउन भन्दै गत असार १० देखि सुरु भएको स्थायी कमिटी बैठकमा प्रधानमन्त्रीको राजीनामा माग भएपछि बैठक चल्न सकेको छैन ।
अर्का अध्यक्ष पुष्पकमल दाहाल प्रचण्ड, वरिष्ठ नेताहरु माधव नेपाल र झलनाथ खनाल, उपाध्यक्ष वामदेव गौतमलगायतले ओलीलाई दुवै पद छोड्न दबाव दिएका छन् । ओली भने यही अवस्थामा कुनै पनि पदबाट राजीनामा नदिने अडानमा छन् ।
