‘फेर्नु छ चाँडो देशको मुहार, हाम्रो भविष्य हाम्रो सरोकार’ भन्दै काठमाडौंमा ओलीका पक्षमा प्रदर्शन
काठमाडौं । पार्टीभित्र नेताहरुको कार्य विभाजनलाई लिएर विवाद उत्कर्षमा पुगेका बेला प्रधानमन्त्री केपी शर्मा ओलीको पक्षमा बुधबार पनि काठमाडौंका विभिन्न ठाउँमा प्रदर्शन भएका छन् । प्रधानमन्त्री ओलीको फोटोसहित ‘फेर्नु छ चाँडो देशको मुहार हाम्रो भविष्य हाम्रो सरोकार’ लेखिएका ब्यानर सहित काठमाडौंको चावाहिल, गोंगबु लगायतका स्थानमा प्रदर्शन भएको हो ।
सत्तारूढ नेपाल कम्युनिष्ट पार्टीको स्थायी कमिटी बैठकमा बहुमत सदस्यले प्रधानमन्त्री र अध्यक्ष दुबै पदबाट ओलीको राजीनामा मागेपछि प्रधानमन्त्री ओलीका पक्षमा सडकमा प्रदर्शन भइरहेका छन् ।
नेकपाका दुई अध्यक्ष ओली र पुष्पकमल दाहाल प्रचण्डबीच छलफलका लागि भन्दै स्थायी कमिटी बैठक असार २६ गतेसम्म स्थगित छ । बुधबार काठमाडौं उपत्यकाका विभिन्न स्थानमा प्रधानमन्त्री ओलीको समर्थनमा प्रदर्शन गरिएको हो । उक्त प्रदर्शनमा राष्ट्रिय झण्डा बोकेर पनि मानिसहरू भेला भएका थिए ।
फोटोः महेश चौलागाईंको फेसबुकबाट
