सरकार भ्रष्टाचारको संरक्षक बनेको माओवादीको आरोप
काठमाडौं । नेकपा माओवादी केन्द्रले सरकारले कांग्रेसका उपसभापति धनराज गुरुङ र नेकपा एमालेका नेता ऋषिकेश पोखरेललाई सहकारी ठगी प्रकरणमा दोषी देखिएपनि संरक्षण गर्ने काम गरेको आरोप लगाएको छ ।
बिहीबार पार्टी मुख्यालय पेरिसडाँडामा बसेको स्थायी समिति बैठकपछि उपाध्यक्ष तथा प्रवक्ता अग्निप्रसाद सापकोटाले सरकारले आफ्नालाई जोगाएर टाढाका मान्छेलाई छानीछानी कारबाही गर्ने काम गरिरहेको बताए ।
उनले यसबाट सरकार भ्रष्टाचारको संरक्षक बनेको स्पष्ट भएको बताए । उनले भने, ‘राम्रो काम गर्नेलाई हटाउने । आफ्नालाई जोगाउने कांग्रेस उपसभापति धनराज गुरुङ सहकारीमा जोडिएको सिँधै छ तर कुनै कारबाही नै छैन । लेखा सभापति ऋषिकेश पोखरेललाई पनि संरक्षण गरिरहेको छ ।’
त्यस्तै, उनले विद्युत् प्राधिकरणका कार्यकारी निर्देशन कुलमान घिसिङको उदाहरण दिँदै सरकारले राम्रो काम गर्नेलाई हटाउन खोजिरहेको पनि बताए ।
सरकार विचार–शून्य रहेको भन्दै मूल्य, मान्यता र आदर्शपनि सरकारमा नरहेको उनले आरोप लगाए । बैठकले सरकार उल्टो बाटो हिँडेको निष्कर्ष पनि निकालेको छ ।
सापकोटाले भने, ‘विद्युत प्राधिकरणमा राम्रो काम भइरहेको छ तर सरकार कुलमानलाई हटाउन खोज्दैछ । अनि अदालतले दोषी ठहर्यााएको मान्छेबाट जग्गा दान लिने काम प्रथम दृष्टिमै भ्रष्टाचारलाई पक्षपोषण गर्ने कुरा हुन्छ । यसबाट सरकार असफल हुँदै गएको स्पष्ट भएको छ ।’
