सिन्धुलीमा गोली प्रहारबाट एकजना घाइते
सिन्धुली । सिन्धुलीमा गोली लागेर एक जना घाइते भएका छन् । आइतबार दिउँसो हरिहरपुरगढी गाउँपालिका ६ ढप्सेमा गोली चल्दा एक जना घाइते भएका हुन् ।
जिल्ला प्रहरी कार्यालय सिन्धुली प्रहरी उपरीक्षक गोविन्दराज काफ्लेका अनुसार गोली लागेर मकवानपुर बागमती गाउँपालिका १, बोटगाऊँका ४० वर्षीय प्रेम बहादुर बम्जन घाइते भएका हुन् ।
गोली हेलमेटको दाहिने भाग र गाला छेडी दाँतमा अड्केको उनले जानकारी दिए । घटनापछि घाइतेलाई उपचारको लागि सर्लाहीको मोडेल अस्पताल लगिएकोमा सामान्य उपचार पछि थप उपचारको लागि वीरगन्जमा रहेको वयोधा हस्पिटलमा लगिएको उनले जानकारी दिए ।
घाइते प्रेमबहादुर बम्जन र उनका भाइ दिलबहादुर बमजन प्र.२–०३–००६ प ८५५४ नम्बरको मोटरसाइकलमा रौतहटबाट सर्लाही हुँदै सिन्धुलीबाट मकवानपुर तर्फ जाने क्रममा तीन जना तराई मूलका जस्तो देखिने अपरिचित मानिसहरूले ढप्सेमा रोकी पैसा मागेको र साथमा रहेको एक हजार २०० रुपैयाँ दिने क्रममा गोली हानेका भाइ दिलबहादुर बम्जनले जानकारी दिएको प्रहरी उपरीक्षक काफ्लेले सरोकार बताए । घटनापछि गोली प्रहार गर्नेहरू फरार रहेको र अनुसन्धान तथा खोजी कार्य भइरहेको उनले बताए ।
