सशस्त्र प्रहरीको ३० वर्षे सेवा अवधि विवादमा सर्वोच्चले दिएन अन्तरिम आदेश, कारण देखाउ आदेश जारी
काठमाडौँ । सर्वोच्च अदालतले सशस्त्र प्रहरीको ३० वर्षे सेवा अवधि विवादमा कारण देखाउ आदेश जारी गरेको छ । मंगलबार सर्वोच्चका न्यायाधीश शारङ्गा सुवेदीको इजलासले सशस्त्र प्रहरीका अधिकृतहरूको तर्फबाट दायर भएको रिटमा कारण देखाऊ आदेश जारी गरेको हो ।
त्यस्तै इजलासले विपक्षीसँग लिखित जवाफ माग गरेको छ । यसअघि यस्तै प्रकृतिको नेपाल प्रहरीका अधिकृतहरूको रिटमा अन्तरिम आदेश जारी भएको थियो । त्यसपछि सशस्त्र प्रहरीका तर्फबाट प्रहरी नायब महानिरीक्षक अभिकुमार खत्रीको नेतृत्वमा १२ जनाले रिट दायर गरेका थिए ।
प्रहरी सेवाको ३० वर्षे सेवा अवधि हटाउन माग गर्दै प्रहरी अधिकृतहरू एकसाथ सर्वोच्च अदालत पुगेका थिए । आगामी भदौ १६ गते अवकाश हुन लागेका प्रहरीहरूले भदौ ५ मा सर्वोच्च अदालतमा ३० वर्षे सेवा अवधि खारेजीको माग गर्दै रिट दायर गरेका थिए ।
