श्रमिक अस्पताल निर्माणका लागि २० अर्ब लाग्ने
काठमाडौं । श्रमिक अस्पताल निर्माणको सम्भाव्यता अध्ययनका लागि गठित कार्यदलले अस्पताल निर्माणका लागि २० अर्ब लागत लाग्ने सुझाव दिएको छ। अस्पतालका लागि तत्काल १० बिघा जग्गा र दीर्घकालका लागि २५ बिघा जग्गा आवश्यक पर्ने कार्यदलको प्रतिवेदनमा उल्लेख छ ।
आइतबार श्रम,रोजगार तथा समाजिक सुरक्षा मन्त्री शेरबहादुर कुँवरलाई बुझाइएको प्रतिवेदनमा १३ वटा सुझाव उल्लेख छ।
प्रतिवेदनमा,’५ सयदेखि १ हजार बेड भएको अस्पताल निर्माणका लागि १० बिघा जग्गा आवश्यक पर्ने भएपनि दीर्घकालिनसम्मको लागि २५ बिघासम्म जग्गा उपयुक्त हुने कार्यदलको ठहर छ । तर, जग्गाकै कारण निमार्ण कार्य रोक्न नहुने र अहिलेलाई ५ बिगाह जग्गा उपलब्ध भएको ठाउँमा पनि अस्पताल निमार्ण कार्य सुरु गर्नु पर्ने कार्यदलले सुझाबमा पेश गरेको छ ’ भनिएको छ।
चाँडै अस्पताल निर्माण कार्य अगाडि बढाउनु उपयुक्त हुने कार्यदलका संयोजक एंव श्रम मन्त्रालयका सहसचिव दीपक काफ्लेले बताए। २०७८ फागुन ५ को मन्त्रिपरिषद् बैठकले श्रमिक अस्पताल स्थापना गर्ने निर्णय गरेको थियो।
कार्यान्वयन प्रक्रिया अगाडि कसरी बढाउने भन्नेबारेमा श्रम मन्त्रालयका सहसचिव काफ्लेको संयोजकत्वमा स्वास्थ्य, वन र भूमि मन्त्रालयका प्रतिनिधिसहित श्रमिक अस्पताल निर्माण सम्भाव्यता अध्ययन कार्यदल गठन गरिएको थियो।
