तेस्रो नेपाली सैनिक आचारसंहिता सप्ताह सुरु
काठमाडौं । तेस्रो नेपाली सैनिक आचारसंहिता सप्ताह सुरु भएको छ । अनुशासित, आचरणयुक्त र जिम्मेवारपूर्ण सैनिक बनाउने उद्देश्यले आचारसंहिता सप्ताह सुरु गरेको सैनिक जनसम्पर्क तथा सूचना निर्देशनालयले जनाएको छ ।
बिहीबारदेखि सुरु भएको सप्ताह वैशाख ९ गतेसम्म सञ्चालन हुने तेस्रो नेपाली सैनिक आचारसंहिता सप्ताह–२०७८ कार्यक्रमको बलाधिकृत रथी प्रभुराम शर्माले एक समारोहकाबीच जङ्गी अड्डास्थित त्रिभुवन आर्मी अफिसर्स क्लबमा सुभारम्भ गरेका छन् ।
कार्यक्रममा बलाधिकृत शर्माले सकलदर्जालाई सम्बोधन गदैै गौरवशाली इतिहास बोकेको सेनाले आफ्नो स्थापनाकालदेखि नै वीरता, वफादारिता र पेशागत दक्षतालाई अक्षुण्ण राख्दै जनताको विश्वासको केन्द्रविन्दु बन्न सफल भएको र यसको मूख्य श्रेय सेनाका भूतपूर्व तथा बहालवाला सच्चा सिपाही र समग्र संस्थालाई नै जाने बताए ।
सेनाका सकलदर्जाको उपस्थितिमा सञ्ंचालन भएको उक्त कार्यक्रममा मानवीय आचरण तथा मूल्य मान्यता सम्बन्धमा महन्त श्री १०८ स्वामी पुरुषोत्तम महाराजबाट अभिप्रेरणात्मक प्रवचन भएको थियो । यस्तै, कर्यक्रममा सैनिक आचारसंहिता सम्बन्धी वृत्तचित्र समेत प्रदर्शन गरिएको थियो ।
