विद्यालय बन्दको नगर्न सरकारलाई सरोकारवालाको सुझाव
काठमाडौं । सरोकारवालाले कोरोना संक्रमणलाई देखाएर तत्काल विद्यालय बन्दको निर्णय नगर्न सरकारलाई सुझाव दिएका छन् ।
शिक्षा मन्त्रालयमा सोमबार बिहान भएको छलफलमा सहभागी शैक्षिक क्षेत्रका सरोकारवालाले विद्यालय बन्द नगर्न सरकारलाई सुझाव दिएका हुन् । उनीहरुले अवस्था हेरेर विद्यालय बन्द गर्नै परे स्थानीय तहलाई अधिकार दिनुपर्ने बताएका छन् ।
छलफलमा सहभागी नगरपालिका संघका अध्यक्ष अशोक ब्यान्जुले गर्नै परे स्थानीय तहहरुले त्यहाँको अवस्था हेरेर गर्न सक्ने बताए । उनले विद्यालय बन्द गर्ने विषयमा केन्द्रबाट निर्णय गर्न नहुने बताए ।
राष्ट्रिय परीक्षा बोर्डका अध्यक्ष प्रा.डा. चन्द्रमणि पौडेलले कोरोनाको प्रभावअनुसार क्षेत्रगत रुपमा निर्णय गर्न सुझाव दिएका छन् । शिक्षा मन्त्रालयका सचिव रामप्रसाद थपलियाले छलफलमा उठेका विषयलाई सीसीएमसी हुँदै मन्त्रिपरिषद बैठकसम्म लैजाने बताए । सीसीएमसीले भने काठमाडौं लगायतका ठूला शहरी क्षेत्रमा कम्तिमा ३ साता शिक्षण संस्था बन्द गर्न मन्त्रिपरिषदमा प्रस्ताव लगेको छ ।
