सर्वोच्चको ऐतिहासिक फैसलाले गौरवको अनुभूति भयोः प्रचण्ड
काठमाडौँ । नेकपाको प्रचण्ड-नेपाल समूहका अध्यक्ष पुष्पकमल दाहाल प्रचण्डले प्रतिनिधिसभा पुनःस्थापना गर्ने फैसला ऐतिहासिक भएको बताएका छन् ।
मंगलबार साँझ चितवनमा आयोजित कार्यक्रममा अध्यक्ष प्रचण्डले यो ऐतिहासिक फैसला रहेको र आफूलाई गौरवको अनुभूति भएको बताएका हुन् । उनले यसअघि तोकिएका विरोध कार्यक्रमलाई देशभर विजय जुलुसका रुपमा मनाउन पार्टी पक्तिलाई अपील गरे ।
उनले संसद् पुनःस्थापना सबैको जित भएको उल्लेख गर्दै विभिन्न राजनीतिक दल, पार्टीका नेता, कार्यकर्ता, नागरिक समाज, बुद्धिजीवी लगायत आन्दोलनमा उत्रिएका सबै जनालाई बधाई र धन्यवाद दिए ।
अब राजनीतिक दलहरुबीच सहमति र समझदारी गरी अगाडि बढ्ने भन्दै अध्यक्ष प्रचण्डले यो आफूहरुको लडाइँ कुर्सीको नभएको बताए । उनले नेकपाको केपी ओली समूहमा लागेकाहरुलाई आफू नेतृत्वको पार्टीमा फर्कन समेत आग्रह गरे ।
