रुपन्देहीमा एकैदिन तीन जना कोरोना संक्रमितको मृत्यु
बुटवल । रुपन्देहीमा शुक्रबार मात्रै तीन जना कोरोना संक्रमितको मृत्यु भएको छ । बुटवलको कोरोना बिशेष अस्पताल, गौतमबुद्ध मुटु अस्पताल र एक जनाको भैरहवास्थित आफ्नै घरमा संक्रमितको मृत्यु भएको हो ।
बुटवलको कोरोना बिशेष आईसोलेसन अस्पतालको सघन उपचार कक्षमा भेन्टिलेटरको सहायतामा उपचाररत ७८ वर्षीय पुरुषको मृत्यु भएको अस्पतालका कोरोना फोकल पर्शन डा सुदर्शन थापाले जानकारी दिए ।
बुटवल ८ मिलनचोकका उनी ९ दिनदेखि कोरोना बिशेष अस्पतालमा उपचाररत थिए । उच्च रक्तचापका दिर्घ रोगी रहेका उनको आज बिहान ९ बजे मृत्यु भएको हो ।
त्यसैगरी बुटवलको गौतमबुद्ध मुटु अस्पतालमा उपचाररत कोरोना संक्रमित ६४ वर्षीया महिलाको मृत्यु भएको छ । भदौ ४ गते निमोनिया उच्च रक्तचाप र मिर्गौलामा गम्भीर समस्या देखिएपछि अस्पताल आएकी भैरहवाकी उनको पनि शुक्रबार बिहान साढे आठ बजे मृत्यु भएको हो ।
उपचारकै क्रममा स्वाव संकलन गरि पीसीआर परीक्षण गर्दा १६ गते कोरोना पोजिटिभ देखिएको अस्पतालका अध्यक्ष एजाज आलमले जानकारी दिए ।
त्यसैगरी सिद्धार्थनगर नगरपालिका वडा नम्बर ८ का ४५ वर्षीय पुरुषको समेत निधन भएको छ । मिर्गौलाका बिरामी उनको लामो समयदेखि डाईलाईसिस भईरहेको थियो ।
भरतपुर अस्पतालमा उपचार गरेर फर्केका उनको परीक्षणको क्रममा कोरोना संक्रमण देखिएको स्वास्थ्य कार्यालय रुपन्देहीका कोरोना फोकल पर्शन केदारनाथ शाहले बताए ।
आज थप डाईलाईसिस गर्न अस्पताल जाने तयारी गरिरहँदा घरमै निधन भएको शाहले जानकारी दिए । योसंगै रुपन्देहीमा शुक्रबारसम्ममा कोरोना संक्रमणबाट मृत्यु हुनेको संख्या १४ पुगेको छ भने बुटवल उपमहानगरमा ५ पुगेको छ ।
