कोरोना भाइरसको परीक्षणका लागि अहिलेसम्म ३ अर्ब १८ करोड ९४ लाख खर्च
काठमाडौं । सरकारले कोरोनाभारइसको पीसीआर परीक्षणको लागि अहिलेसम्म तीन अर्ब बढी खर्च भएको जनाएको छ । शुक्रबार आयोजित पत्रकार सम्मेलनमा स्वास्थ्य मन्त्रालयका प्रवक्ता डा. जागेश्वर गौतमले हालसम्म पीसीआर परीक्षणको लागि सरकारले तीन अर्ब १८ करोड ९४ लाख ४४ हजार ५ सय रुपैयाँ खर्च गरेको जानकारी दिए ।
हालसम्म ५ लाख ७९ हजार ८ सय ९९ जनाको पीसीआर परीक्षण भएको उनले बताए । प्रवक्ता गौतमले एकजना संक्रमित भेटाउन सरकारले १ लाख ४ हजार ६ सय ३० रुपैयाँ खर्च गरेको पनि जानकारी दिए । प्रवक्ता गौतमले एक हजार जनाको पीसीआर परीक्षण गर्नको लागि पीपीई सेट बाहेक प्रयोगशालामा मात्रै पाँच हजार पाँच सय रुपैयाँ खर्च हुने जानकारी दिए ।
यस्तै आईसीयूमा राखेर उपचार गर्दा झनै बढी खर्च हुने उनले बताए । प्रवक्ता गौतमले एकजनालाई ३० दिन आईसीयूमा राख्दा चार लाख ५० हजार रुपैयाँ खर्च हुने जानकारी दिए ।
