महाधिवेशनको तयारीलाई निकासको सुत्र बनाऔँः नारायणकाजी श्रेष्ठ

काठमाडौं । सत्तारुढ नेकपाका प्रवक्ता नारायणकाजी श्रेष्ठले पार्टी एकताको रक्षा गर्नु अहिलेको आवश्यकता भएको बताएका छन् ।

आन्तरिक विवादका कारण पार्टी विभाजनको संघारमा पुगेको बेलामा प्रवक्ता श्रेष्ठले मंगलबार ट्वीट गर्दै एकताको रक्षा गर्दै सार्वभौमिकता एवम् अखण्डताको रक्षा गर्दै समाजवादउन्मुख सामाजिक आर्थिक रुपान्तरण गर्नुपर्नेमा जोड दिएका हुन्।

श्रेष्ठले लेखेका छन्, ‘पार्टी एकताको रक्षा यतिबेलाको हाम्रो वटमलाईन हो । यसको उद्देश्य राष्ट्रिय सार्वभौमिकता एवं अखण्डताको रक्षा, लोकतन्त्रको रक्षा एवं बिस्तार,समाजवादउन्मुख सामाजिक आर्थिक रुपान्तरण हो । तसर्थ पार्टी एकताको रक्षा, यथास्थितिमा गुणात्मक परिवर्तन र महाधिवेशनको तयारीलाई निकासको सुत्र बनाऔँ।’

पार्टीभित्रको विवादका कारण नेकपाको स्थायी कमिटी बैठक पटक पटक स्थगित हुँदै आएको छ । आज बिहान ११ बजेका लागि बोलाइएको बैठक दिउँसो एक बजेका लागि सारिएको छ । त्यस्तै अध्यक्षद्वय पुष्पकमल दाहाल प्रचण्ड र केपी शर्मा ओलीबीच भएका दर्जनौ बैठक पनि निष्कर्षविहीन हुँदै आएका छन् । जसका कारण नेकपा कतै फुटको संघारमा पुगेको त होइन भन्ने आंकलन गर्न थालिएको छ ।