‘कि रोजगारी दे, नत्र कोरिया पठाइदे !’
काठमाडौं । रोजगार अनुमति प्रणाली (इपीएस) अन्तर्गत कोरियाली भाषा पास गरि रोजगारमा जान नपाएका युवाहरुले बुधबार काठमाडौंमा विरोध प्रदर्शन गरेका छन् । इपीएस पास गरेर उडानको प्रतिक्षामा रहेका युवाहरुले काठमाण्डौको माइतीघरमा विरोध प्रदर्शन गरेका हुन् । उडानको प्रतिक्षामा रहेका कामदार पठाउन सरकारसँग उनीहरुको माग छ ।
सरकारी समन्वयको अभावमा रोजगारी गुम्ने चिन्तासमेत उनीहरुले व्यक्त गरेका छन् । सामाजिक दूरी कायम गरी भएको प्रदर्शनमा सहभागीहरुले ‘कि रोजगारी दे, कि कोरिया जान दे’, ‘कोरियाको लागि अन्तर्राष्ट्रिय उडान सुरु गर’ लगायत नारा लेखिएका प्लेकार्ड बोकेका थिए ।
दुई साताभित्र पनि सरकारले कोरिया पठाउने पहल नगरे तीन हजारभन्दा बढीको रोजगारी गुम्ने खतरा रहेको उनीहरुले बताएका छन् । रोजगारी गुमेपछि अहिलेसम्मको समय र मिहिनेत खेर जाने, डिप्रेसनको शिकार हुने डर भएकाले तत्काल कोरिया पठाउन माग गर्दै शान्तिपूर्ण प्रदर्शन गरिएको उनीहरुको भनाइ छ ।
लकडाउन सुरु भएसँगै सरकारले हवाई सेवा रोकेकाले कामदारहरु रोकिएका हुन् । चार महिनादेखि कामदार कोरिया जान पाएका छैनन् । भाषा परीक्षा पास गरेर उडानको तालिका आएकाहरु समेत अकस्मात रोकिएका थिए ।