सरकारले भारतबाट फर्केका आफ्ना नागरिकको व्यवस्थापन गर्न नसकेको सांसदहरुको आरोप
काठमाडौं । सांसदहरुले नेपाल–भारत सीमाबाट नेपाल ल्याइएका नेपालीहरुको व्यवस्थापन सरकारले गर्न नसकेको आरोप लगाएका छन् । शनिबार बसेको संसदको अन्तर्राष्ट्रिय सम्बन्ध समिति बैठकमा उनीहरुले नेपालीहरुलाई स्वदेश भित्राउनु राम्रो काम भएपनि उनीहरुलाई नेपालमा व्यवस्थापन गर्न नसकेको आरोप लगाएका हुन् ।
नेपाल ल्याएपछि विश्व स्वास्थ्य संगठनको मापदण्ड अनुसारको क्वारेन्टाइनमा राख्नुपर्ने भएपनि पूर्वाधार पर्याप्त नभएको उनीहरुले बताए । बैठकमा कांग्रेसका सांसद पुष्पा भूषालले भारतबाट नेपाल भित्राइएका नेपालीहरुलाई व्यवस्थित क्वारन्टाइनमा राख्नुपर्ने बताइन् ।
उनले कोरोना नियन्त्रणको प्रभावकारी पूर्वाधार गरेर छिटै अन्य देशमा रहेका नेपालीहरुलाई स्वदेशमा ल्याउनुपर्ने जिकिर गरिन् । त्यस्तै सांसद राम कार्कीले सीमाबाट भित्रने नेपालीको यकिन तथ्याङ् र ठेगाना राख्नुपर्ने तथा उनीहरुलको पीसीआर बिधिबाट जाँच गरेपछिपनि केहि दिन क्वारेन्टाइनमा राख्नुपर्ने बताए । बैठकले वार्षिक प्रतिवेदनलाई अन्तिम रुप दिएको छ ।
प्रतिवेदमा विदेशमा रहेका नेपालीको कोभिड–१९ को महामारीबाट सुरक्षा, उनीहरुका समस्या सम्बोधन, बन्दाबन्दीले विदेशमा अलपत्र परेका नेपालीको उद्धार, लिपुलेक क्षेत्रमा निर्मित सडक, लिम्पियाधुरा, लिपुलेकलगायत कालापानी भू–भागमा नेपालको सुरक्षा र प्रशासनिक उपस्थिति कायम गर्न सरकारलाई दिएको सुझाव र निर्देशन उल्लेख गरिएको पवित्रा निरौला खरेलले जानकारी दिइन् । त्यस्तै समिति सदस्यहरुले भारतबीचको सीमा क्षेत्रमा सुरक्षा जाँच चौकी (बिओपी) स्थापना, नेपालको नयाँ नक्सा जारी भइसकेपछि चीन र भारतले नेपाललाई पठाएका कूटनीतिक पत्राचार प्रतिवेदनमा थप्नुपर्ने सुझाव दिएका थिए ।
