संचारमन्त्रीले कमिशन मागेको अडियो सार्वजनिक

काठमाडौं । सञ्चारमन्त्री गोकुल बाँस्कोटाले सेक्युरिटी प्रिन्टिङ प्रेस खरिदमा कमिसनका लागि सेटिङ गरेको अडियो सार्वजनिक भएपछि प्रधानमन्त्री अप्ठ्यारोमा परेका छन् । प्रधानमन्त्री केपी शर्मा ओलीका निकट मानिएका र सरकारको प्रतिरक्षाका लागि खरो उत्रिने मन्त्री बास्कोटाले नै कमिशन मागेको अडियो सार्वजनिक भएपछि बास्कोटा त नैतिक संकटमा परेका छन् नै प्रधानमन्त्री पनि अप्ठ्यारोमा परेका छन् ।

हाम्राकुरा डट कम र नागरिक दैनिकले मन्त्री बाँस्कोटाले सेक्युरिटि प्रिन्टिङ प्रेसको खरिदमा आफूले ७० करोड कमिसन पाउनगरि सेटिङ् गरिरहेको अडियोसहितको समाचार प्रकाशित गरेका छन् । यो प्रकरण बाहिरिए लगत्तै राजनीतिक बृत्तमा त ठूलो खैला बैला मच्चिएकै छ, भष्ट्राचारविरुद्ध शून्य सहनशीलताको सरकारी नारामाथि पनि प्रश्न उठ्न थालेको छ ।

राप्रपा अध्यक्ष कमल थापाले मन्त्री बाँस्कोटालाई पदबाट हटाएर निष्पक्ष छानविनको माग गरेका छन् ।

आफू प्रधानमन्त्रीको शुभचिन्तक रहेको भन्दै अध्यक्ष थापाले बाँस्कोटाका सम्बन्धमा सार्वजनिक भएको अडियोलाई लिएर छानविन गर्नु पर्ने माग राखेका हुन् ।