प्रदेश एकका थप २८ जना कोरोनामुक्त

विराटनगर । विराटनगरस्थित कोशी कोभिड–१९ उपचार केन्द्रबाट २८ जना संक्रमित कोरोनामुक्त भएका छन् । पछिल्लो दोस्रो परीक्षणमा कोरोनाको रिपोर्ट नेगेटिभ देखिएपछि उनीहरुलाई डिस्चार्जको लागि चिकित्सकले सिफारिस गरेका हुन् ।

डिस्चार्ज हुनेमा २२ जना पुरुष र ६ जना महिला रहेका अस्पताल व्यवस्थापन समितिका संयोजक ज्ञानबहादुर बस्नेतले जानकारी दिएका छन् ।

अस्पतालमा उपचारतः उदयपुरका ४ जना, झापाका ७ जना, मोरङका ६ जना, सुनसरी ४ जना, सप्तरी २ जना, धनकुटा ४ जना र खोटाङ १ जना रहेका उनले बताए । यसअघि उपचार केन्द्रबाट ३० र बीपी प्रतिष्ठान धरानबाट १८ जनाले कोरोना परास्त गरेर घर फर्किसकेका छन् । योसँगै प्रदेश १ बाट ७६ जनाले कोरोनालाई जितिसकेका छन् ।