राष्ट्रिय जनस्वास्थ्य प्रयोगशालामा अहिलेसम्म १२ सय ७७ जनाको कोरोना परीक्षण
काठमाडौं । स्वास्थ्य तथा जनसंख्या मन्त्रालयले पोखरामा अहिलेसम्म कोही पनि व्यक्तिमा कोरोना संक्रमणको पोजेटिभ रिपोर्ट नभेटिएको स्पष्ट पारेको छ । शुक्रबार मन्त्रालयको नियमित पत्रकार सम्मेलनमा प्रवक्ता डा. विकास देवकोटाले पोखराबाट कोरोनाको पोजेटिभ रिपोर्ट नआएको प्रष्ट पारेका हुन् । विभिन्न मिडियामा पोखरामा कोरोना पोजेटिभ रिपोर्ट आएको भन्ने खबर आएको भएपनि कुनै पनि केस पुष्टि नभएको उनको भनाई छ ।
प्रवक्ता देवकोटाले सबै प्रदेशमा मेसिन गएको र त्यहाँ परीक्षणको काम सुरु भएको भए पनि ‘भ्यालिडेसन’ आवश्यक पर्ने हुँदा नमुना पुनः परीक्षण गर्नुपर्ने अवस्था आएको बताए । देवकोटाले केही शंकास्पद केसको परीक्षण केन्द्रीय प्रयोगशालामा भएपछि मात्र यकिन हुने प्रष्ट पारे ।
उनले अहिलेको अवस्थामा स्वास्थ्यकर्मीको मनोवल गिर्ने कुनैपनि काम नगर्न पनि आग्रह गरे । उनका अनुसार काठमाडौंको टेकु अस्पतालमा १२ सय ७७ जनाको कोरोना परीक्षण भइसकेको छ भने धरान, जनकपुर, हेटौडा लगायतका स्थानमा पनि कोरोना परीक्षण सुरु गरिएको प्रवक्ता देवकोटाले जानकारी दिए । मन्त्रालयका अनुसार नेपालभर १२० जना आइसोलेसनमा रहेका छन् । त्यस्तै भक्तपुरको क्वारेन्टाइनमा रहेका सवैको दोश्रो नमूना परीक्षणका लागि पठाइएको मन्त्रालयले जनाएको छ ।
