निम्नवर्गीय जनताका लागि आर्थिक प्याकेज घोषणा गर्न सरकारलाई प्रचण्डको आग्रह
काठमाडौँ । सत्तारुढ नेकपाका अध्यक्ष पुष्पकमल दाहाल प्रचण्डले कोरोना भाइरसको संक्रमणका बेला अग्रपंक्तिमा रहेका सुरक्षाकर्मी र स्वास्थ्यकर्मीलाई आवश्यक स्वास्थ्य सामाग्रीको व्यवस्थामा राज्यले थप जोड दिनुपर्ने बताएका छन् ।
शनिबार भिडियो सन्देश जारी गर्दै अध्यक्ष प्रचण्डले विश्वमा महामारीको रुपमा फैलिएको कोरोना भाइरसविरुद्धको लडाईको अग्रमोर्चामा रहेर जोखिम उठाउने स्वास्थ्यकर्मी र सुरक्षाकर्मीको मनोबल थप उच्च बनाउन सरकारलाई आग्रह गरेका हुन् ।
भिडियो सन्देशमा प्रचण्डले दैनिक ज्याला गरेर जीविकोपार्जन गर्ने निम्न वर्गीय नागरिकका लागि आश्यक आर्थिक प्याकेज ल्याउन पनि सरकारसंग माग गरेका छन् । उनले यो संकटको अवस्थामा निम्नवर्गीय जनताको सहयोगका लागि निजी क्षेत्रलाई मुठी फुकाउनसमेत आग्रह गरे ।
उनले लकडाउन आफ्नै स्वास्थ्यका लागि भएको भन्दै आमनागरिकलाई घरमै बसेर सरकारको निर्देशन पालना गर्न आग्रह गरेका छन् । उनले पार्टीका कार्यकर्तालाई सुरक्षित तवरले कोरोनाविरुद्धको लडाईंमा अग्रपंक्तिमा रहेर काम गर्न निर्देशन दिएका छन् ।
