अस्ट्रेलियामा एक जना नेपालीलाई कोरोना भाइरसको संक्रमण
अस्ट्रेलियाको तास्मानीया राज्यको होर्बाटस्थित होटलमा कार्यरत एक जना नेपालीलाई कोरोना भाइरसको संक्रमण देखिएको छ । स्थानीय स्वास्थ्य अधिकारीहरुका अनुसार २० वर्षीय ती युवा नेपालबाट सिंगापुर, सिड्नी ट्रान्जिट हुँदै गत फागुनमा होर्बाट पुगेका थिए । उनलाई रुघाखोकी लागेको भएपनि स्वास्थ्य परीक्षण नगरी होटलमा काम गर्न पुगेका थिए ।
उनले गत हप्ता होबार्टको ग्रान्ड चान्सलर होटलमा केही दिन काम गरेका कारण उनीसँग नजिक भएर काम गर्नेहरुलाई छुट्टै बस्न चिकित्सकले सुझाव दिएका छन् । उनमा रुघाखोकीको थप लक्षणहरु देखिन थालेपछि नेपालबाट फर्किएको नौ दिपछि मात्र रोयल होर्वाट अस्पतालमा परीक्षणका लागि भर्ना भएका थिए ।
उनको स्वास्थ्य परीक्षणपछि भाइरसको पोजेटिभ लक्षण देखिएको थियो। उनीसँगै बस्ने चार र अन्य तीन जनालाई १४ दिनसम्म छुट्टै राखिएको छ। उनको स्वास्थ्य अवस्था सन्तोषजनक रहेको चिकित्सक मार्क भेचलले जानकारी दिएका छन् । हालसम्म तास्मानिया राज्यमा मात्र एक सय १४ जनाको परीक्षण भइसकेको छ ।
अस्ट्रेलियामा मात्र ३८ जना कोरोना भाइरस संक्रमितहरुको उपचार भइरहेको छ भने चार सयभन्दा बढीको परीक्षण अनुसन्धानमै रहेको छ । अस्ट्रेलियामा कोरोनाका कारण तीन जनाको ज्यान गइसकेको छ ।
