अमेरिकामा भेटियो ’आधा भाले, आधा पोथी’ चरा
अमेरिकाको पेन्सिल्भेनियामा एक पक्षीविद्ले आधा पोथी र आधा भालेजस्तो देखिने एउटा चराको तस्बिर खिचेका छन् । उनकी एकजना साथीले नोर्दन कार्डिनल भनिने उक्त चरा देखा परेको बताएपछि पक्षीविद्ले आफ्नो क्यामरामा उक्त चराको तस्बिर लिएका थिए । द्विलिङ्गी वा उभयलिङ्गी चराहरू दुर्लभ हुन्छन् । भाले कार्डिनलहरू चम्किलो रातो रङ्गका हुन्छन् भने पोथीहरू फिक्का खैरो रङ्गका हुन्छन् ।
यी रङ्गको मिश्रणले चरा द्विलिङ्गी भएको सङ्केत गर्न सक्छ । अवकाशप्राप्त पक्षीविज्ञ जेमी हिलले बीबीसीलाई भने, ‘यो जीवनकालमै एउटा र लाखौँ साक्षात्कारमध्येको एउटा थियो।’ हिलका साथीले उनलाई उनले एउटा अस्वाभाविक चरा देखेको बताएकी थिइन् । सुरुमा हिलले उक्त चरा ’लूसिस्टिक’ होला भन्ठानेका थिए । चराले आफ्नो प्वाँखमा हुनुपर्ने रङ्ग अर्थात् पिग्मेन्टेशन गुमाएको अवस्थालाई ’लूसिसिजम’ अर्थात् ’पाण्डु’ भनिन्छ । उनलाई सुरुमा उक्त चरा आधा भाले र आधा पोथी भएको जस्तो लागेको थिएन ।
तर मोबाइलमा तस्बिरहरू हेरेपछि उनले उक्त चरालाई ’बाइल्याटरल गाइन्यान्ड्रोमर्फिजम’ भएको हुन सक्ने आशङ्का गरेका थिए । बाइल्याटरल गाइन्यान्ड्रोमर्फिजम भएका चरामा काम गर्ने अवस्थाकै अण्डाशय र डिम्बाशय दुवै हुन्छन् । उनी उक्त कार्डिनल चरा देखिएको स्थानमा गए। एक घण्टाभित्र उनी उक्त अस्वाभाविक चराको तस्बिर लिन सफल भए ।
जेमी हिलले ४८ वर्षदेखि चराहरूको अवलोकन गर्दै आएका छन् । जेमी हिलले ४८ वर्षदेखि चराहरूको अवलोकन गर्दै आएका छन् । आधा भाले र आधा पोथीको रूप भएका चराहरू भेटिनु निकै दुर्लभ घटना भएको वेस्ट्रर्न इलनोई विश्वविद्यालयका प्राध्यापक ब्रायन पीयर बताउँछन् । उनले अमेरिकाका नोर्दन कार्डिनल चराहरूमा ’बाइल्याटरल गाइन्यानन्ड्रोमर्फिजम’को सर्वेक्षण गरेका छन् ।
शुक्रकीटले डिम्बलाई निषेचन गरेपछि भ्रुण बन्न कोषहरू विभाजन हुने क्रममा त्रुटि हुँदा यस्तो अवस्था आउने उनी बताउँछन् । नेशनल जियोग्राफिकका अनुसार सन् २०१९ मा एक दम्पतीले नजिकैबाट त्यसै क्षेत्रमा यस्तै चरा देखेका थिए । हिल अहिले देखिएको चरा पनि त्यही हुन सक्ने अनुमान गर्छन् । प्राध्यापक पीरका अनुसार नोर्दन कार्डिनल उत्तरी अमेरिकामा जताजतै पाइने चरा हो । यसको भाले र पोथीलाई सहजै चिन्न सकिने भएकाले उभयलिङ्गी चरा चिन्न पनि सजिलै सकिने उनको भनाइ छ ।
