प्रहरी प्रमुख थापामाथि राप्रपा अध्यक्षले उठाए प्रश्न, युवा संघको सहअध्यक्ष बनेको आरोप
काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले नेपाल प्रहरीका आइजीपी दीपक थापा नेकपा एमालेको भ्रातृ संगठन युवा संघको सहअध्यक्ष बनेको आरोप लगाएका छन् ।
मंगलबार काठमाडौंको बल्खुमा पार्टीको सभालाई सम्बोधन गर्दै अध्यक्ष लिङ्देनले काठमाडौंको तिनकुने घटनालाई लिएर आइजीपी थापामाथि यस्तो आरोप लगाएका हुन् ।
संसदीय समितिमा आइजीपी थापाले अश्रुग्यास एक्सपाइरी डेटको नभएको बताएका थिए । त्यसैलाई संकेत गर्दै अध्यक्ष लिङ्देनले आइजीपीमाथि आक्रोश पोखेका हुन् ।
अध्यक्ष लिङ्देनले भने, ‘प्रहरी प्रमुख एमालेको प्रतिनिधि भएर निर्लज्जतापूर्वक हामीले हानेको अश्रुग्यास कसरी एक्सपाइ हुन्छ भन्छ । प्रहरी प्रहरी भएर बस्नुपर्छ, कुनै राजनीतिक दलको भ्रातृ संगठन भएर बस्ने होइन । प्रहरी प्रमुख त एमालेको युवा संघको सहअध्यक्ष पो रहेछ त । हामीले भेटेको खोका, अश्रुग्यासका बोक्रा जहाँ एक्सपाइरी डेट २००८ लेखेको रहेछ । अनि त्यो प्रहरी प्रमुख एमालेको प्रतिनिधि भएर निर्लज्जतापूर्वक हामीले हानेको अश्रुग्यास कसरी एक्सपाइ हुन्छ भन्छ ।’
अध्यक्ष लिङ्देनले अहिले फूली लगाइदिने दलका नाइके र सिफारिस गर्ने सधैं सत्तामा नहुने कुरा याद राख्न पनि आग्रह गरे । उनले चैत १५ गते काठमाडौँको तिनकुनेमा भएको प्रदर्शनपछि देशको राजनीतिक घटनक्रममा केही परिवर्तन भएको बताए ।
उनले राजावादीको प्रदर्शनमा राज्यको तर्फबाट आतंक सिर्जना गरिएको भन्दै हिंसा भड्काएको आरोप जनाए। उनले भने, ‘राप्रपा हिंसामा विश्वास गर्दैन। जेका लागि भए पनि हिंसाको विरोध गर्छ। १५ गते भएको हिंसाको निन्दा र खेद प्रकट गर्दछौँ । त्यो हिंसा राज्यका तर्फबाट गरिएको थियो ।’
