अध्यादेशकाबारेमा कांग्रेसले गर्यो विज्ञसँग छलफल
काठमाडौं । नेपाली कांग्रेसले सरकारले ल्याएको अध्यादेशका विषयमा विस्तृत छलफल गरेको छ । आइतबार बसेको संसदीय दलको बैठकमा कांग्रेसले अध्यादेशका विषयमा छलफल गरेको हो कांग्रेसले तीन जना विज्ञलाई सहभागी गराएर अध्यादेशका विषयमा राय–सुझाव लिएको प्रमुख सचेतक श्याम घिमिरेले जानकारी दिए ।
अध्यादेशमा केही त्रुटि छन् कि भनेर विज्ञलाई सहभागी गराएर राय सुझाव लिइएको प्रमुख सचेतक घिमिरेले बताए । बैठकमा गृहमन्त्री रमेश लेखकले सरकारको काम कारबाही र अध्यादेशको औचित्यमाथि प्रकाश पारेका थिए।
उनले देशको समग्र विकासलाई चलायमान बनाउन र सुशासनलाई बलियो बनाउन सरकारले अध्यादेश ल्याएको बताएका थिए । त्यस्तै बैठकमा कांग्रेस–एमालेबीच बनेका विभिन्न संयन्त्रका विषयमा पनि छलफल भएको थियो। ।
महामन्त्री गगन थापाले संयन्त्रमार्फत सरकारको काम कारबाहीलाई छिटो छरितो बनाउन सहयोगी भूमिका खेलेको बताएका थिए । उनले सरकारलाई अझ प्रभावकारी रूपमा अगाडि बढाउनुपर्ने सुझाव दिएको प्रमुख सचेतक घिमिरेले जानकारी दिए ।
यसअघि शनिबार बसेको कांग्रेस पदाधिकारी बैठकले अध्यादेशकाबारेका एकढिक्का भएर प्रतिरक्षा गर्ने निर्णय गरेको थियो ।
