सरकार उल्टो बाटो हिँड्यो, अब प्रधानमन्त्रीले राजीनामा दिँदा हुन्छः अध्यक्ष प्रचण्ड
काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीको राजीनामा मागेका छन् ।
शुक्रबार विपक्षी दलहरुको तर्फबाट संयुक्त वक्तव्य जारी गर्न आयोजित पत्रकार सम्मेलनमा प्रचण्डले ओलीले नैतिकताका आधारमा प्रधानमन्त्री पदबाट राजीनामा दिनु उचित हुने बताएका हुन् । उनले सरकार उल्टो बाटो हिँडेको आरोप लगाए ।
उनले भने, ‘सरकार गठन गर्दा जे गर्ने भनिएको थियो, ती काम सरकारले सुरु गरेकै छैन । सरकार उल्टो बाटो हिँडेको छ । संविधान संशोधन प्रधानमन्त्री आफैँले २०८७ मा मात्रै हुन्छ भनेपछि त अन्य सुशासनबारे भनिएका कुरा गर्ने अपेक्षा छैन । नैतिकताको आधारमा सरकारले राजीनामा दिनु नै उचित हुन्छ ।’
उनले सरकारले संसद अधिवेशन नबोलाएर विशेष अधिवेशन मात्रै नभइ आवश्यक परेर सडक संघर्षमा जानसक्ने चेतावनीसमेत दिए ।
उनले संसदीय व्यवस्थामा दुई ठूला दल मिलेर सरकार बनाउने प्रचलन नभएकाले यो सरकार चल्ने अवस्था नरहेको बताए । उनले यो सरकार गठन भएपछि जनतामा निराशा झन् बढेकाले सरकारले औचित्य पुष्टि गर्न नसकेको बताए ।
