ओली सरकार अब नचल्ने निष्कर्षका साथ प्रचण्डले थाले छलफल, माधव नेपाल र राजेन्द्र लिङ्देनसँग वार्ता
काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले विपक्षी दलहरुसँगको संवादलाई तीव्र बनाएका छन् ।
बिहीबार नेकपा एकीकृत समाजवादीका अध्यक्ष माधव नेपालसँग छलफल गरेका प्रचण्डले शुक्रबार पनि अध्यक्ष नेपाल र राप्रपा अध्यक्ष राजेन्द्र लिङ्देनसँग पनि छलफल गरेका छन् ।
शुक्रबार प्रचण्ड र अध्यक्ष नेपालबीच समाजवादी मोर्चालाई पुनरजागृत गराउने विषयमा कुरा भएको छ । अध्यक्ष नेपालले समाजवादी मोर्चालाई सक्रिय बनाइने र माघ २ गते मोर्चाको बैठक बोलाइएको उनले जानकारी दिए ।
दुई नेताबीच छलफल चलिरहँदा शुक्रबार राष्ट्रिय प्रजातन्त्र पार्टीका अध्यक्ष राजेन्द्र लिङ्देन र जनता समाजवादी पार्टीका नेता राजेन्द्र श्रेष्ठ पनि उक्त छलफलमा सहभागी भएका थिए ।
संविधान संशोधनका विषयमा प्रधानमन्त्री केपी शर्मा ओलीको फरक अभिव्यक्ति आएपछि प्रचण्डले पछिल्लो समय समाजवादी मोर्चालाई सक्रिय बनाउने र अन्य विपक्षी दललाई पनि एकठाउँमा ल्याउन छलफल अघि बढाएका छन् ।
नेताहरुको छलफलपछि अध्यक्ष प्रचण्डले ओली नेतृत्वको सरकार लामो समय नजाने बताए । प्रचण्डको भनाई थियो, ‘अप्राकृतिक भएकाले अब यो गठबन्धन चल्दैन।’
राप्रपा अध्यक्ष लिङ्देनले पनि सरकारको अहिलेकै नेतृत्व र व्यवस्थाले जनताको उत्थान नहुने भएको विकल्प खोज्नुपर्ने बताएका छन् ।
प्रधानमन्त्री ओलीले पार्टीको केन्द्रीय कमिटी बैठक समापनका अवसरमा २०८७ मा मात्र संविधान संशोधन हुने बताएका थिए । प्रधानमन्त्रीको भनाईपछि कांग्रेस पनि बिच्किएको बताइन्छ ।
सरकार गठन हुँदा कांग्रेस र एमालेबीच सात बुँदे सहमति भएको थियो । जसको दोस्रो बुँदामा संविधान संशोधनको विषय उल्लेख छ ।
तर सहमति विपरित प्रधानमन्त्रीको भनाई आएको भन्दै कांग्रेस नेताहरुले आपत्ति जनाएका छन् । सत्तारुढ दुई दलमा खटपटको संकेत पाएपछि प्रचण्डले विपक्षीलाई एकठाउँमा ल्याउन वार्ता र संवादलाई तीव्रता दिन थालेका छन् ।
