विपीन जोशीको रिहाइलाई विशेष प्राथमिकतामा राख्न इजरायली राजदूतलाई परराष्ट्रमन्त्रीको आग्रह
काठमाडौं । परराष्ट्रमन्त्री डा. आरजु राणाले नेपालका लागि इजरायली राजदूत समुलिक एरी बासलाई हमासको नियन्त्रणमा रहेका विपीन जोशीको रिहाइका लागि पहल गर्न आग्रह गरेकी छन् ।
बुधबार परराष्ट्र मन्त्रालयमा भएको भेटमा परराष्ट्रमन्त्री राणाले राजदूत बाससँग जोशीलाई हमासको नियन्त्रणबाट मुक्त गराउन पहल गर्न आग्रह गरेकी हुन् ।
हमास समूहले अपहरण गरी लगेकामध्ये ३४ जनालाई रिहा गर्न लागेको भन्ने सूचना आइरहेकाले यस विषयमा मन्त्री राणाले इजरायली राजदूतसँग जानकारी लिएकी थिइन् ।
उनले जोशीको रिहाइलाई विशेष प्राथमिकतामा राख्न इजरायल सरकारलाई आग्रह गरेकी छन् । जवाफमा राजदूत बासले हमासको नियन्त्रणमा रहेका बृद्धवृद्धा, महिला तथा बालबालिका समेतका नाजुक स्वास्थ्य अवस्थामा रहेका नागरिकहरूको रिहाइका लागि इजरायल सरकारले केही महिनाअघि हमासलाई सूची पठाएको र पहिलो चरणमा उनीहरूलाई नियन्त्रण मुक्त गर्ने तयारी भएको भन्ने सूचना आएको बताएका थिए ।
सन् २०२३ को अक्टोबरमा इजरायली भूमिमा आक्रमण गरी प्यालेस्टाइनी हमास समूहले १० जना नेपालीसहित एक हजारभन्दा बढी व्यक्तिको हत्या गरेका थिए । त्यसक्रममा केहीलाई अपहरण गरी लगेका थिए । त्यसमा नेपाली विद्यार्थी जोशी पनि परेका थिए ।
जोशीको रिहाइको लागि सरकारले कतारी राजा नेपाल भ्रमणमा आउँदा पनि कुरा उठाएको थियो । तर जोशीको अहिलेसम्म अवस्था अज्ञात छ ।
