राज्य व्यवस्था समितिमा सांसद थानीलाई रामहरि खतिवडाले बोल्न रोकेपछि….
काठमाडौं । संसदको राज्यव्यवस्था तथा सुशासन समिति सभापति रामहरि खतिवडामाथि कांग्रेस सांसद हृदयराम थानीले प्रश्न उठाएका छन् ।
सोमबारको समितिको बैठकमा सांसद थानी बोलिरहेको बेला सभापति खतिवडाले अवरोध गरेपछि दुई जनाबीच भनाभन भएको हो । सभापति खतिवडाले सांसद थानीलाई बोल्नका लागि समय दिएका थिए ।
थानीले समितिमा प्राप्त उजुरीहरू कसरी पार लगाउने र लामो समयदेखि थन्किएका विधेयकलाई कसरी कानुनको रूप दिने भनेर धारणा राखिरहेका बेला खतिवडाले हस्तक्षेप गरी विधेयक अघि बढ्ने जवाफ दिएका थिए ।
थानीले सभापति खतिवडाले आफ्नो संयोजकत्वमा रहेको उपसमितिले बुझाएको प्रतिवेदनपछि अख्तियार विधेयक आईसीयूमा पुर्याउन खोजेको आरोप लगाए । त्यसपछि समिति सञ्चालनको प्रक्रिया नै ठिक नभएको भन्दै थानी उनीमाथि खनिएका हुन् ।
थानीले भने, ‘सभापति कति बोल्नुहुन्छ ? म बोल्दिनँ तपाईं बोल्नुस् । जहिल्यै कुरा काटेको छ । बोल्न त पाउनुपर्यो । सबै तपाईंले जान्नुभएको छ । तपाईं नै बोल्नुस् । म बोल्दिनँ ।’
त्यसपछि रिसाएका सांसद थानीलाई सभापति खतिवडाले पटक पटक बोल्न आग्रह गरेका थिए । तर थानी त्यसपछि बोल्न मानेनन् ।
सभापति खतिवडाले भर्खरै उपसमितिले प्रतिवेदन बुझाएको भन्दै विधेयक अघि बढ्ने बताएका थिए । पटक–पटकको आग्रहपछि पनि थानीले बोल्न अस्वीकार गरेपछि खतिवडाले सांसद ईश्वरी न्यौपानेलाई समय दिएका थिए ।
बैठकमा उपसभामुख इन्दिरा राना, पूर्वगृहमन्त्री रवि लामिछाने र संघीय संसद्का महासचिव पदमप्रसाद पाण्डेयविरुद्ध परेको उजुरीको छलफल भइरहेको थियो ।
