अनेरास्ववियुले भन्यो-लिपुलेकका विषयमा भारत र चीनबीच सहमति हुँदा नेपाल सरकार बेखबर रहनु गम्भीर
काठमाडौं । नेकपा (एकीकृत समाजवादी) निकट विद्यार्थी संगठन अनेरास्ववियुले भारत र चीनबीच दार्चुलाको लिपुलेकलाई तीर्थ यात्रु आवतजावतको केन्द्र बनाउने भनेर गरेको सहमतिप्रति आपत्ति जनाएको छ ।
बिहीबार अनेरास्ववियुकी अध्यक्ष आरती लामाले विज्ञप्ति जारी गरी नेपाली भूमिको विषयमा दुई देशबीच भएको सहमतिप्रति आफ्नो संगठनको गम्भीर ध्यानाकर्षण भएको बताएकी हुन् ।
विज्ञप्तिमा भनिएको छ, ‘चीनको राजधानी बेइजिङमा भारत र चीनका प्रतिनिधिहरुबीच नेपाली भूभागको उपयोगबारे सहमति हुनु, त्यसबारे नेपाल सरकार बेखबर रहनु र विषय सार्वजनिक भइसक्दा समेत सरकारी तवरबाट कुनै प्रतिक्रिया नआउनु अत्यन्त लज्जास्पद भएको हाम्रो संगठनको निष्कर्ष छ । अनेरास्ववियूले छिमेकी मुलुकहरूले मच्चाएको सीमा आतङ्क र हेपाहा प्रवृत्तिविरुद्ध खेद प्रकट गर्दै नेपाल विरुद्धका गतिविधि रोक्न चेतावनी दिन चाहन्छ।’
गतसाता बेजिङमा चीन र भारतका उच्चस्तरीय नेताहरु सम्मिलित द्विपक्षीय सीमा बैठकमा भारतीय तीर्थयात्री र पर्यटकका लागि मानरोबर र कैलायको यात्रा सुचारु गर्ने सहमति भएको थियो ।
भारतका राष्ट्रिय सुरक्षा सल्लाहकार अजित डोभाल र चीनका विदेशमन्त्री वाङ यीले नेतृत्व गरेको सीमा वार्तामा नेपाली भूमि लिपलेक हुँदै मानसरोवर यात्रा सुरु गर्ने निर्णय गरिएको चीनको परराष्ट्र मन्त्रालयले जनाएको छ ।
