एमालेका प्रदेश सांसद चौधरी पार्टीबाट निलम्बित, पार्टी अध्यक्ष र महासचिवमाथि गाली गरेको आरोप
काठमाडौं । नेकपा एमालेले लुम्बिनी प्रदेशसभा सदस्य दुर्गा चौधरीलाई पार्टीबाट निलम्बन गरेको छ । सांसद चौधरीले पार्टी अध्यक्ष केपी शर्मा ओली र महासचिव शंकर पोखरेलसहितको मानहानी गरेको आरोपमा पार्टीको जिल्ला कमिटी बाँकेले उनलाई सबै जिम्मेवारीबाट निलम्बन गरेको हो ।
पार्टीका बाँके जिल्ला अध्यक्ष निरक गुरुङले मंगलबार पत्र जारी गरी चौधरीलाई पार्टीबाट निलम्बन गरिएको जानकारी दिएका हुन् ।
चौधरीले पार्टी अध्यक्ष ओली र महासचिव पोखरेलसहितको मानहानी हुने गरी सार्वजनिक रुपमा गालीगलौज गर्ने, समाजिक सञ्जालमा लेख्ने, कार्यकर्तालाई खुइल्याउने र पार्टीविरुद्धमा समाचार लेखाउने जस्ता गतिविधि गरेको आरोप छ । चौधरी बाँके क्षेत्र नम्बर १ (ख) बाट लुम्बिनी प्रदेश सभा सदस्यमा निर्वाचित सांसद हुन् ।
