नपुग्ने चिठी

डा. गोविन्दशरण उपाध्याय ।
ओलीजी, चौथोपटक प्रधानमन्त्री बन्दै हुनुहुन्छ, तपाईंको लागि यो पद र काम नौला छैनन् । जनताले नेतासँग सुशासनको आशा गर्न छाडेका छन् । साथै, कुनै पनि भ्रष्ट्राचारजन्य अभियोग र अभियुक्तहरू दण्डित हुने छैनन्, यो तत्थ्य पनि जनताले बुझेका छन्, यहाँ पनि आशा छैन । तर जीवनको चौथो आयाममा “प्रगतिशील राजनीति“ गर्ने तपाईंजस्ता पाका नेताबाट आशा गर्ने ठाउँ छन्, त्यो पनि तपाईंहरूले बुझेमात्र । यहाँ सबै बुझेर पनि बूझ पचाउनेहरूको शक्ति चल्छ – सत्य यही हो । त्यै पनि तपाईंको सरकार बन्ने छ र यो सरकार तपाईंकै हुनेछ । सक्नुहुन्छ भने निम्न कामको आरम्भ गर्नुस् ।

(१) स्थानीय सरकारलाई बलियो बनाउनुस् र नेता व्यवस्थापकका लागि निर्माण गरिएको प्रदेश–संरचनालाई आर्यघाटमा सेलाउनुस् । यसको लागि के–कस्ता काम गर्नुपर्छ, तपाईंहरू र तपाईले बुझ्नु भएकै छ ।

(२) सामानुपातिक व्यवस्थामा सांसद बनाउने वैधानिक व्यवस्था  खारेज गर्नुस् र संसदलाई प्रत्यक्ष निर्वाचनबाट आएका प्रतिनिधिको थलो बनाउनु होस् । आसेपासे, झोलेआदि सबैका लागि (क्षमा गर्नुस्) राष्ट्रिय सभामा लाने व्यबस्था गरे हुन्छ । छिमेकी भारतमा यस्तै अभ्यास छ, असजिलो मान्नु पर्दैन ।

(३) संविधानले जातिवादको पुनस्थापना गरेको छ । जनताले जातिको कुरा गर्दा दण्डित हुनु पर्ने तर नेता र सरकारले संविधानमा फलाना जातिहरूका लागि विशेष व्यवस्था गरेर घृणावादीहरूलाई प्रोत्साहित गरेको छ । समस्या छुवाछुतको हो, जातिको होइन । जातिवाद खारेज गर्न पहल गर्नुस्, छुवाछुत मान्ने र गर्नेलाई हदैसम्मको दण्ड दिने व्यवस्था गर्नुस् ।

(४) आदिवासी–जनजाति, मधेसी वा दलित भएकै आधारमा नेपालका रैथाने बाहुनक्षेत्रीहरूप्रति विष–वमन गरेर यहाँका मौलिक संस्कृति, सभ्यता र नागरिकहरू विरुद्ध घृणा फैलाउने विरुद्ध हदैसम्मको कानुनी व्यवस्था  गर्नुस् । यो देश नेपालका हरेक नागरिक को हो, कसैले कसैलाई शरणार्थी भन्ने छुट छैन । झन् जातिवाद नमानेर वर्गवाद मान्ने प्रगतिशीलहरूका लागि त छैन नै ।

(५) ‘झोलावाद’को अन्त्य गर्न पहल गर्नुस् तर तपाईंबाट अन्त्य हुँदैन तर भविष्यमा तपाईंको काम मध्ये असल काम भनेर इतिहास लेखिने छ । झोलावादको अन्त्य हुँदासाथ शिक्षा, न्याय, स्वास्थ्यआदि क्षेत्रमा नपत्याउँदो सुधार आउने छ ।

(६) सक्नुहुन्छ भने स्वदेशी उद्योग र उद्योगपतिलाई प्रोत्साहन दिन कानुन बनाउनु होस् । यसको अर्थ, विदेशी उद्योगपतिहरूलाई वेवास्ता गर्नुस् भनेको होइन । मैले सुनेअनुसार मध्यपूर्वका देशहरूमा जोसुकैले लगानी गर्न सक्छ तर तेहाका नागरिकको ५१% भागिदारी हुनैपर्छ ।

(७) अहिलेका प्रमुख समस्याहरूमा झोलावाद, घृणावाद तथा धर्मपरिवर्तन गराएर देशको मौलिकता समाप्त पार्ने शक्तिहरू नै हुन् । देशको मौलिक संस्कृति नष्ट हुँदै गर्दा तपाईंको मुटु पोल्नुपर्छ । केही गर्न पर्दैन, आफ्नो सरकारलाई कानुन कार्यान्यवन गर्न निर्देशन दिनुस् ।

धेरै सुझाव बाँकी छन् तर जनताको सुझाव भन्दा विदेशीहरूको सुझावमा चल्ने सरकारहरू बोक्दै आएको अनुभव गरेका हामी जनताको कुरा सुन्नुपर्छ जस्तो लाग्छ भने तपाईंलाई बधाई दिनुपर्छ । अन्यथा, तपाईंको एउटा कार्यकाल थपिंयो, तपाईंलाई फाइदा भयो, जनतालाई ‘रूखमा बेल पाक्यो, कौवालाई हर्ष न विस्मात् ।’
स्वस्तिअस्तु