इलाममा एमाले–माओवादीको आँधी चिरेर रास्वपाले जित्यो भने परम्परागत राजनीतिमा पक्कै पहिरो जानेछ
नारायण गाउँले ।
सुवास नेम्वाङका छोराले जित्छन् होला ! कांग्रेस र माओवादी मिल्दासमेत नेम्वाङले जितेको ठाउँ हो ! अहिले माओवादी एमालेसँग छ । उनी युवा र शिक्षित छन् । सुवास नेम्वाङका छोरा भएकैले उनले टिकट पाएको सत्य हो, र उनको कमजोरी पनि यत्ति हो, तर यसैले उनलाई ‘अयोग्य’ बनाउँदैन । बझाङ पनि शायद एमालेकै भागमा जानेछ । नेम्वाङपछि कांग्रेसका खड्का र रास्वपाका लिम्बू क्रमशः दाबेदार हुन सक्लान् । तर नेम्वाङ बाहेक अन्य जसले जिते पनि त्यसको सन्देश अलग र रोचक हुनेछ । यो परीक्षा कांग्रेस र रास्वपाका लागि महत्त्वपूर्ण देखिन्छ ।
सामाजिक सञ्जाल र पत्रपत्रिकाको ऐनामा सबैभन्दा कमजोर र कम चर्चित उम्मेद्वार भनेको कांग्रेसकै देखिन्छ । त्यहाँ रास्वपा र पहिचानको बाढी देखिन्छ । त्यसमाथि एमाले–माओवादीको आँधी पनि छ । यो बाढी र आँधीमा पनि कांग्रेस उभियो भने उसको आत्मविश्वास पक्कै बढ्नेछ ।
बाँकी सबै उम्मेद्वार धेरैथोरै कम्युनिष्ट पृष्ठभूमिसँग गाँसिएको, एउटै जातीय समूहभित्रका रहेकोले कांग्रेस उम्मेद्वारले जित्न सक्ने आधार पनि होला । उनको स्थानीय ‘टच’ राम्रो छ भन्ने पनि सुनिन्छ । रवि लामिछानेलाई लिएर यतिबेला धेरै नकारात्मक समाचारहरू छापिएका छन् । रास्वपाको लोकप्रियता र जनसमर्थनबारे अनेक आशङ्का र प्रश्नहरू तेर्सिएको बेला पनि छ । यदि यस्तो बेला पनि उसको जम्मेदवारले चुनाव जित्छन् भने यो रास्वपा स्वयं र नेपाली राजनीतिको भविष्यका लागि समेत नयाँ सन्देश हुनेछ ।
रास्वपा एउटा व्यक्तिमात्रै नभएर एउटा आन्दोलन हो, अभियान हो र नयाँ लहर हो भन्ने साबित हुनेछ । कांग्रेस र पहिचानको बाढी अनि एमाले–माओवादीको आँधी चिरेर रास्वपा अडियो भने परम्परागत राजनीतिमा पक्कै पहिरो जानेछ । यी सबै पहाड़ चिरेर पहिचानवादी भनिने मुडा चिन्हले जित्यो भने झन् ठूलो आश्चर्य हुनेछ । पहिचानको मुद्दा त आफ्नो ठाउँ होला, मुडाले जित्ने हो भने देशभर अर्को चुनावमा शायद ‘स्वतन्त्र उम्मेदवार’को ठूलो लहर देखिनेछ । यो जीतले दलहरूमाथि गह्रुगो चुनौती थपिन सक्छ ।
